Туркиянинг Измир шаҳри халқаро аэропорти вилоятда давом этаётган ўрмон ёнғинлари сабабли парвозларни вақтинчалик тўхтатди, деб хабар бермоқда Milliyet газетаси.
Аднан Мендерес аэропорти Газиэмир туманидаги ёнғин зонаси яқинида жойлашган. Давом этаётган ўрмон ёнғинлари, тутун ва ўт ўчирувчи самолётларининг ишига халақит бермаслик учун аэропорт самолётларни қабул қилиш ва қўндиришни тўхтатди. Измирга келган баъзи рейслар бошқа аэропортларга йўналтирилди. Ёнғин назоратга олингандан кейин парвозлар одатдагидек давом этиши кутилмоқда.
Аэропортнинг онлайн бортида баъзи режалаштирилган рейслар қолдирилди, кўплари бекор қилинди.
Аввалроқ Измир губернатори Сулаймон Элбан вилоятнинг учта туманида йирик ўрмон ёнғинлари содир бўлганини маълум қилганди. Ёнғин бир қанча туманлар аҳоли яшаш жойларига етиб борди ва у ердаги одамлар эвакуация қилинди. Ёнғинларни ўчириш учун 1100 нафар ўт ўчирувчи, 6 та самолёт, 23 та сув ташувчи машина ва булдозерлар жўнатилди. Тезлиги соатига 70 дан 117 километргача ўзгариб турадиган кучли шамоллар туфайли ёнғин ўчириш самолётларининг ишлаши ва мунтазам равишда сув пуркаши қийин кечмоқда, деб хабар беради tass.ru.
