Бу ҳақда Коррупцияга қарши курашиш агентлиги маълум қилди.

Тадқиқот натижаларига кўра:

- Жамоатчилик кўпинча коррупцияни порахўрлик ва қариндош-уруғчилик деб тушунади.

- 50 фоиздан ортиқ респондентга кўра, коррупция — бу мансабни суиистеъмол қилиш ва қариндош-уруғчилик, 40 фоиздан камроғи учун эса қимматбаҳо совғалар беришдир.

- Аксарият кишилар совға беришни коррупция эмас, балки миннатдорчилик деб билади.

- Пора олиш (88,4 фоиз) ва пора бериш (68,4 фоиз) кўпчилик томонидан қораланади, аммо яхши хизмат учун кичик совғалар одатийдек қабул қилинади.

- Респондентларнинг 74,0 фоизи коррупция ҳолатлари ҳақида хабар беришга, жумладан, 82,2 фоизи электрон платформа ёки мобил илова орқали хабар беришга тайёр.

- 12 фоиз респондент коррупция ҳақида хабар беришни салбий ҳолат деб ҳисоблайди.

- Хабар бермасликнинг асосий сабаблари сифатида коррупциядан ўзлари манфаатдорлиги (19,8 фоиз) ва кимга мурожаат қилишни билмаслик (20,4 фоиз) қайд этган.

- Сўралганларнинг ярми хабар бериш оқибатларидан қўрқади, 13,8 фоизи эса миннатдорчилик белгиси сифатида ўзи хоҳлаб пул беришини таъкидлади.

- Респондентларга кўра, «Суюнчи», «тўёна», «раҳмат» кабилар ҳам фақатгина миннатдорлик, ҳурмат ва қўллаб-қувватлаш учун ихтиёрий тарзда амалга оширилади.

- 64 фоиз респондент коррупцияга қарши курашувчи идораларга ишонади.

Тадқиқотнинг тўлиқ натижалари билан бу ердаги ҳавола орқали танишинг.

Маълумот ўрнида: Мазкур тадқиқот Коррупцияга қарши курашиш агентлиги ҳамда Корея Республикаси Коррупцияга қарши курашиш комиссияси, БМТ Сеул сиёсат маркази ва Европа Иттифоқи ҳамкорлигида ўтказилди.