Маълум қилинишича, Мексикада яшовчи 59 ёшли эркак, касаллик аломатлари пайдо бўлишидан олдин уч ҳафта давомида ётоқда ётган. Шу йилнинг 17 апрель куни эса у иситма, нафас қисилиши, ич кетиши, кўнгил айниши каби аломатлар билан тез ёрдамга мурожаат қилган.
Орадан бир ҳафта ўтгач, у Миллий нафас олиш касалликлари институтига ётқизилгач, ўша ерда вафот этди.
Унинг ўлимидан сўнг, соғлиқни сақлаш идоралари марҳумдан олинган намуналарни синовдан ўтказди. 8 май куни Юқумли касалликларни тадқиқ қилиш марказининг Ривожланаётган касалликлар молекуляр биологияси лабораторияси беморда А(H5N2) гриппи учун намуна мусбат эканини маълум қилди.
ЖССТ бу дунё миқёсида қайд этилган парранда гриппининг А(H5N2) кичик тури билан касалланган одамнинг лаборатория томонидан тасдиқланган биринчи ҳолати ва Мексикада қайд этилган биринчи H5 инфекцияси эканини маълум қилди. Таъкидланишича, жабрланувчида парранда ёки бошқа ҳайвонларга таъсирчанлик мавжуд бўлмаган.
Шунингдек, Мексикадаги қушларда ҳам H5Н2нинг бир нечта эпидемияси қайд этилган, шу жумладан, Мексика штати билан чегарадош Мичоакан штатидаги ҳовлидаги паррандачилик фермасида ҳам ушбу эпидемия аниқланган.
Бундан ташқари, Мексика штатидаги иккита муниципалитетда паст патогенли парранда гриппининг (LPAI) А(H5N2) иккита эпидемияси қайд этилган. Бироқ бу каби касалликнинг одамда учраши яқинда паррандачилик эпидемияси билан боғлиқми ёки йўқ, буни аниқлаш мумкин эмас.
