Шу йилнинг 16 июль куни Қашқадарё вилояти Кўкдала тумани Олтиндала маҳалласида жойлашган аҳолига газ тўлдириш станцияси ҳудудида ёқилғи сақланадиган резервуарда чақнаш юз бергани ҳақида хабар берган эдик. Афсуски, портлашда 4 киши ҳалок бўлганди.
Бош прокуратура матбуот хизматининг хабар беришича, мазкур ёнғин бўйича Жиноят кодексининг 205-моддаси (ҳокимият ёки мансаб ваколатини суиистеъмол қилиш) ва 259-моддаси (ёнғин хавфсизлиги қоидаларини бузиш) асосида жиноят иши қўзғатилди.
Айни пайтда соҳанинг тегишли мутахассислари иштирокида ёнғин кўлами ҳамда етказилган моддий зарар миқдорини аниқлаш ишлари олиб борилмоқда.
Жиноят иши доирасида суд-тиббий, суд-кимёвий, биологик, криминалистик ва ёнғин-техникавий экспертизалар тайинланган.
Тергов ҳаракатлари давом этмоқда.
