Б.Саидов Н.Германни ваколатини муваффақиятли якунлагани билан табриклаб, унинг раҳбарлигида МОПДММ минтақада тинчлик ва барқарорликни сақлаш, ҳамкорликни мустаҳкамлаш ва барқарор ривожланишга муҳим ҳисса қўшганини таъкидлади.

Ўзбекистон ТИВ раҳбари Н.Герман БМТ Хавфсизлик Кенгашининг Терроризмга қарши кураш қўмитаси Ижроия дирекцияси раҳбари сифатидаги янги лавозимида Марказий Осиё давлатлари билан ҳамкорликни мустаҳкамлашда давом этишига умид билдирди.

Н.Герман ўз фаолияти давомида Марказий Осиёда, хусусан, Ўзбекистонда туб ўзгаришларнинг гувоҳи бўлганини таъкидлаб, унинг касбий фаолиятида ҳар томонлама ёрдам бергани учун Ўзбекистон томонига миннатдорлик билдирди. Президент Шавкат Мирзиёевнинг очиқ, прагматик ва конструктив ташқи сиёсатига юксак баҳо берилди. Таъкидланганидек, мамлакатимиз ташқи сиёсатининг асосий устувор йўналиши минтақа мамлакатлари билан яхши қўшничилик ва ўзаро манфаатли шериклик муносабатларини ривожлантириш ҳисобланади.

МОПДММ раҳбари ўзининг янги лавозимида Ўзбекистон билан яқин ҳамкорликни давом эттиришга, хатар ва таҳдидларга қарши самарали курашишда кўмаклашишга тайёрлигини тасдиқлади, деб хабар беради Ташқи ишлар вазирлиги матбуот хизмати.