Жорий йил 18-20 март кунлари Москва шаҳрида «MITT-2025» халқаро туризм ярмаркаси бўлиб ўтди.
Ушбу ярмаркада Туризм қўмитаси ва «Миллий PR-маркази» ДУК томонидан «Ўзбекистон» миллий стенди ташкил этилди ва юртимиз туризм салоҳияти юқори савияда намойиш этилди.
Юртимизда фаолият юритувчи 8 та турфирма, «Uzbekistan airways» миллий авиакомпанияси ҳамда Самарқанд, Сурхондарё, Тошкент, Навоий вилоятлар ва Тошкент шаҳри туризм бошқармалари вакиллари иштирок этди ва 100 дан ортиқ келишувларга эришилди.
Ўзбекистон стенди кўргазмадаги энг кўп ташриф буюрилган стендлардан бирига айланди. Кўргазманинг биринчи иш кунида Ўзбекистоннинг сайёҳлик салоҳияти ва маданиятига бағишланган стендда миллий рақслар намойиш этилди, туризмнинг турли йўналишлари ҳақида маълумотлар тақдим этилди. Унда ташриф буюрувчилар ўзбек халқининг бой маданияти ва тарихи билан таништирилди, деб хабар беради Туризм қўмитаси матбуот хизмати.
Таъкидлаш жоизки, Ўзбекистон ўзининг қадимий тарихи ва бой маданий мероси туфайли россиялик сайёҳлар орасида энг машҳур йўналишларнинг ТОП-10 талигига киради.
MITT — 30 йилдан бери Москвада ўтказилиб келинаётган Халқаро туризм ва меҳмондўстлик саноати кўргазмаси. Бу туризм соҳасидаги энг йирик ва аҳамиятли «B2B» тадбирларидан бири бўлиб, ҳар йили дунёнинг турли бурчакларидан келган соҳа мутахассисларини бир жойга тўплайди.
