Бу ҳақда «Дунё» АА деб хабар бермоқда.
2013 йилда 63 мамлакат ва 30 дан ортиқ халқаро ташкилотларни бирлаштирган Кўп ўлчовли камбағаллик бўйича Глобал ҳамкорлик тармоғи (Мультидименционал Повертй Пеэр Нетwорк (МППН) ташкил этилган бўлиб, у сиёсатчиларга кўп ўлчовли камбағалликни баҳолашда, уни камайтириш бўйича янада самарали чора-тадбирларни ишлаб чиқишда ёрдам беради. Ушбу тармоқ доирасидаги йиллик учрашувлар Берлин (2014 й.), Картахене (2015 й.), Акапулко (2016 й.), Пекин (2017 й.), Ёханнесбург (2018 й.), Маэ (2019 й.) ва Сантягода (Чили) 2021 йилда бўлиб ўтган. Шу каби учрашув жорий йилда Ўзбекистонда ҳам бўлиб ўтади.
Ўзбекистон камбағалликни қисқартириш масалалари билан фаол шуғуллана бошлади. Камбағаллик биринчи марта Президентнинг 2020 йилдаги Мурожаатномасида мамлакат учун ўта муҳим масала сифатида расман тан олинди. Ўша пайтда 6 миллионга яқин одам камбағал бўлиб, меҳнатга лаёқатли аҳолининг 41% норасмий секторда банд эди.
«Ижтимоий ҳимоянинг ягона реестри» ахборот тизимининг яратилиши аҳолини ижтимоий қўллаб-қувватлашни сезиларли даражада кучайтириш имконини берди. 2017 йилда ижтимоий ёрдам олган оилалар сони 500 мингни ташкил этган бўлса, 2023 йилга келиб бу кўрсаткич 2,3 миллионга етган. 2018 йилдан 2023 йилгача ижтимоий нафақалар бўйича харажатлар 3,7 баробарга сезиларли даражада ошди.
Янги иш ўринлари яратиш мақсадида тадбиркорликни ривожлантиришни қўллаб-қувватлаш орқали камбағаллик муаммосини бартараф этиш учун «Ҳар бир оила – тадбиркор» ҳамда «20 минг тадбиркор ва 500 минг малакали мутахассис» дастурлари ишга туширилди. Шунингдек, ўз бизнесини йўлга қўяётган аёлларни рағбатлантириш ва қўллаб-қувватлаш мақсадида тадбиркор аёлларга ҳам алоҳида ёрдам кўрсатилмоқда.
2022 йилда энг кичик маъмурий бирлик – маҳаллалар даражасида камбағалликни камайтириш ва тадбиркорликни қўллаб-қувватлашга қаратилган «Маҳаллабай» миллий тизими жорий этилди, уларнинг сони мамлакатимизда қарийб 9,4 мингтани ташкил этади. 2022-2024 йилларда тизим томонидан 977,6 мингта оилавий тадбиркорлик лойиҳаларига 1,7 миллиард доллар миқдорида микрокредитлар, шунингдек, 152 минг нафар аҳолига қарийб 52 миллион долларлик субсидиялар ажратилди. Ушбу тизимнинг жорий этилиши туфайли 2021 йил бошидан буён Ўзбекистонда камбағаллик даражаси 17 фоиздан 11 фоизга сезиларли даражада камайди. Деярли 2 миллионга яқин одам камбағалликдан чиқарилди.
Ўзбекистонда камбағаллик муаммосининг жиддийлиги ва уни ҳал этишда эришилган ютуқлардан келиб чиқиб, 27-28 август кунлари Тошкентда ва 29 август куни Самарқандда Кўп ўлчовли камбағаллик масалалари бўйича халқаро ҳамкорлик тармоғининг 9 йиллик юқори даражадаги анжуманини ўтказиш тўғрисида қарор қабул қилинганлиги бежиз эмас. Юқори даражадаги тадбирда жаҳон етакчилари, сиёсатчи ва иқтисодчилар, етакчи олим ва мутахассислар иштирок этади.
