“Ажабланарлиси шундаки, мени француз полициясининг хатоси туфайли ҳибсга олишди: 2024 йил августигача улар Франция ва Европа Иттифоқи қонунларини эътиборсиз қолдириб, талаб қилинган ҳуқуқий тартиб-қоидалар орқали Telegramга ўз сўровларини юборишмади”, деди у.

Дуровнинг таъкидлашича, орадан бир йил ўтиб тергов тадбиркор ва Telegramни айбини аниқлай олмади. “Бизнинг модерация амалиётимиз саноат стандартларига мос келади ва Telegram ҳар доим Франциядан келган барча қонуний талабларга жавоб бериб келган”, дея аниқлик киритди у.

Дуровнинг сўзларига кўра, унинг ҳибсга олинишининг ягона оқибати Франциянинг эркин давлат имижига путур етказишдир. Шунингдек, у ҳибсга олинганидан бир йил ўтиб, ҳар 14 кунда Францияга қайтишга мажбур бўлаётганини, шу билан бирга апелляция муддати ҳали белгиланмаганини айтди.

Ўтган йилнинг 24 августида Дуров Париждаги Ле-Бурже аэропортида бир қатор айбловлар, жумладан, жиноий гуруҳ таркибида ноқонуний операцияларни амалга ошириш мақсадида онлайн платформани бошқаришда иштирок этганликда айбланиб ҳибсга олинган эди. Бундай ҳуқуқбузарлик, Париж прокуратураси баёнотига кўра, 10 йилгача қамоқ ва 500 минг евро жарима билан жазоланиши мумкин. Тергов судьясининг қарори билан тадбиркор 5 миллион евро миқдорида гаров тўлаш мажбурияти билан суд назоратига ўтказилди. Шунингдек, унга ҳафтасига икки марта полиция бўлимига келиш буюрилган ва Францияни тарк этиш тақиқланган.

Июнь ойининг ўрталарида Франция ҳукумати Дуров учун суд назорати шартларини юмшатиб, унга 10 июлдан бошлаб республика ҳудудини тарк этишга рухсат берди, деб хабар берди oxu.az.