Президентлик сайлови илк марта сайловлар давомида тўпланган миллий тажриба, илғор хорижий сайлов амалиёти, шунингдек, халқаро стандартлар асосида шакллантирилган Сайлов кодекси асосида бўлиб ўтмоқда. Мазкур сайлов кодексида Президентлик сайловининиг ўзига хос хусусиятлари билан бирга, сиёсий партиялар ва уларнинг номзодлари томонидан олиб борилаётган ташвиқот турлари, шакллари ҳамда усуллари аниқ белгилаб қўйилди.
Бундан ташқари, мамлакатимиз тарихида илк бор янги сиёсий партия сифатида Ўзбекистон Экологик партияси ўзининг сиёсий ҳуқуқидан фойдаланиш ва иштирок этиш истагини билдирди. Сайловга тайёргарлик асносида Экопартия платформаси кўриб чиқилди.
«Биз келажак учун жавобгармиз» шиори остидаги сайловолди дастурининг бош мақсади – мамлакатда экологик барқарорликни таъминлаш ҳамда табиий ресурслардан оқилона фойдаланиш, яшил тараққиёт тамойилларини иқтисодиётнинг барча соҳаларига кенг жорий этиш орқали халқимиз ва келажак авлод учун муносиб турмуш шароитлари яратиш ҳамда фаровон жамият барпо этишдан иборат.
Сайловда юртдошларимиз мамлакатимиз тинчлиги ва осойишталиги, Ватанимиз тараққиёти, унинг порлоқ истиқболи учун овоз бермоқда.
