Қулупнай танлаш ва сақлашда муҳим жиҳатларга эътибор бериш лозим. Аввало, сифатли қулупнай қуруқ, бутун, шикастланмаган ва иложи борича яшил қалпоқчаси билан бўлиши керак.
Қулупнай сотиб олаётганда унинг ҳидини текшириш муҳим. Етилган табиий қулупнай ёқимли ва аниқ сезиладиган ҳидга эга бўлади. Агар қулупнай ҳеч қандай ҳид чиқармаса ёки кимёвий моддалар ҳиди сезилса, уни харид қилиш тавсия этилмайди.
Бундан ташқари, меванинг ташқи юзаси ҳаддан ташқари ялтироқ ва сунъий намлантирилган кўринса, бу унинг нитратлар ёки бошқа зарарли моддалар билан етиштирилганидан дарак бериши мумкин.
Қулупнайни узоқ муддат сақлаш тавсия этилмайди, чунки у жуда нозик бўлиб, тезда сифатсизланади. Агар уни музлатгичда сақлаш керак бўлса, қулупнай қуритилиб, кенг идишда ҳаво ўтказмайдиган шароитда жойлаштирилиши лозим.
Шунингдек, ювилган қулупнайни узоқ сақлаш ярамайди, чунки намлик меванинг тез чиришига сабаб бўлади.
Энг яхши усул – қулупнайни сотиб олинган куннинг ўзида ёки бир неча соат ичида истеъмол қилишдир.
Қулупнайни кўп миқдорда харид қилишдан тийилиш лозим, чунки у энг мазали ва фойдали ҳолатда янги терилганида бўлади. Шу сабабли, бозорлардан ёки ишончли деҳқонлардан тез-тез ва оз-оздан сотиб олиш тавсия этилади.
Қулупнай антиоксидантлар, C витамини, клетчатка ва организм учун фойдали минералларга бой бўлиб, юрак-қон томир тизимига ижобий таъсир кўрсатади, иммунитетни кучайтиради ва умумий саломатлик учун муҳим аҳамият касб этади.
