Бекобод шаҳар “Фарҳод” чегара постида Тошкент вилояти Экология бошқармаси, вилоят божхона бошқармаси ҳамда тегишли органлар билан ҳамкорликда ўтказилган назорат тадбирларида навбатдаги ҳуқуқбузарлик ҳолатига чек қўйилди.

1989 йили туғилган Тожикистон Республикаси фуқароси Й.Б. Ўзбекистон Республикасидан Тожикистон Республикасига 400 дона Ўрта Осиё чўл тошбақаси олиб кетаётган вақтда Бекобод шаҳар “Фарҳод” чегара постида тўхтатиб қолинди.

Мутахассисларнинг таъкидлашича, ушбу тошбақа турининг табиий популяциясини сақлаб қолиш мақсадида “Қизил китоб”га киритилган бўлиб, мамлакатимизнинг барча адирликларида учрайди.

Хусусан, у мустаҳкамлашган қумлар, сертупроқ чўлларда яшаб, тоғ шароитида ҳатто денгиз сатҳидан 1 минг 300 метр баландликкача кўтарилади. Баъзан водийдаги сийрак майса даштлар ва қишлоқ хўжалиги ерлари, шудгор, полиз ва далаларда ҳам учрайди.

Ҳозирда ҳуқуқбузарларга қонуний баҳо бериш учун тегишли ҳужжатлар расмийлаштирилиб, суд органларига юбориш чоралари кўрилмоқда. Тошбақалар эса Зангиота туманида жойлашган “Табиат бағрида” питомнигига вақтинча сақлаш учун берилди.