Учрашувда Ўзбекистоннинг БМТ ва унинг ихтисослашган тузилмалари билан ҳамкорлиги муносабатлар тарихида энг юқори даражага кўтарилгани алоҳида қайд этилди. Айниқса, кейинги йилларда гендер тенглик, хотин-қизларнинг ҳуқуқларини таъминлаш, имкониятларини кенгайтириш йўналишида «БМТ-аёллар» тузилмаси билан ҳамкорлик янги босқичга чиққани айтиб ўтилди.
Мулоқот чоғида Хотин-қизларнинг жамиятдаги ролини ошириш, гендер тенглик ва оила масалалари бўйича республика комиссияси билан тузилма ўртасида қўшма лойиҳаларни амалга ошириш орқали ҳамкорлик алоқаларини янада мустаҳкамлаш масалалари кўриб чиқилди.
Хусусан, гендер бюджетлаштириш, гендер статистикаси ҳамда гендер аудит йўналишларида ўзаро тажриба ўрганиш, илғор амалиётларни жорий этиш бўйича фикр алмашилди.
Муносабатларни янада ривожлантириш мақсадида ҳамкорлик бўйича тегишли ҳужжат лойиҳасини ишлаб чиқиш, унда аниқ йўналишларни белгилашга келишиб олинди, деб хабар беради Олий Мажлис Сенати матбуот хизмати.
