Нодирбек Якуббоев немис шахматчиси Александер Донченко билан кечган баҳсда устунликка эришди. Жавоҳир Синдоров эса мексикалик Хосе Мартинесга қарши оғир ва муросасиз беллашувда зафар қучди.
Бу натижалар туфайли ярим финалда икки ҳамюртимиз — Жавоҳир Синдоров ва Нодирбек Якуббоев — ўзаро куч синашади. Бу, ўз навбатида, камида бир ўзбекистонлик шахматчи финалга чиқиши ва тарихда илк бор 2026 йилги даъвогарлар турнирида юртимиз вакили иштирок этишини англатади. Агар 3-ўрин учун баҳсни ҳам ҳисобга олсак, икки шахматчининг ҳам даъвогарлар турнирига йўл олиш эҳтимоли жуда юқори.
Жаҳон кубоги жаҳон чемпионини аниқлаб бермасада, мусобақада биринчи уч ўринни эгаллаган шахматчилар 2026 йилги шахмат тожи учун даъвогарлар турнирига йўлланма олади.
Ярим финал баҳслари 21—22 ноябрь кунлари бўлиб ўтади.
Ярим финал жуфтликлари:
- Жавоҳир Синдоров (Ўзбекистон) — Нодирбек Якуббоев (Ўзбекистон)
- Андрей Есипенко (Россия) — Вей Ли (Хитой)
