“Қишлоқ хўжалиги транспортини автоном бошқариш тизимларининг етакчи ишлаб чиқарувчиси Cognitive Pilot сунъий интеллект томонидан бошқариладиган ва дунёда ўхшаши йўқ, Россиядаги биринчи тўлиқ автоном, симсиз мини тракторни тақдим этди. Машина Томскдаги робототехника маҳсулотларини ишлаб чиқаришга мўлжалланган Cognitive Pilot заводида лойиҳалаштирилган ва ишлаб чиқарилган”, дейилади компания хабарида.
Бундай трактор асосан қишлоқ хўжалиги ишларини бажариши мумкин. Робот бажарилган ишларнинг сифатини назорат қилиш ва ускунанинг ҳолатини кузатиш имконини берувчи датчиклар билан жиҳозланган. Шунингдек, мини-тракторга тупроқнинг физик-кимёвий кўрсаткичларини назорат қиладиган тизим ўрнатилган.
Ишлаб чиқувчиларнинг таъкидлашича, бундай роботлар машаққатли меҳнатни интеллектуал меҳнат билан алмаштириш, шунингдек, механизаторлар етишмаслиги билан боғлиқ муаммоларни ҳал қилиш имконини беради.
Ишлаб чиқувчилар 2025 йилда сунъий интеллектга эга Cognitive Pilot мини тракторларини серияли ишлаб чиқаришни бошлашни режалаштирмоқда, деб хабар беради ria.ru.
