Вазирлар Маҳкамасининг “Чағониён” тарихи давлат музей-қўриқхонаси фаолиятини ташкил этиш тўғрисида”ги қарори лойиҳаси жамоатчилик муҳокамасига қўйилди.
Унга кўра, Туризм ва маданий мерос вазирлиги ҳузуридаги Маданий мерос агентлиги таркибида давлат муассасаси шаклидаги “Чағониён” тарихи давлат музей-қўриқхонаси ташкил этилади.
Денов шаҳри Мустақиллик кўчасидаги Саид Оталиқ меъморий мажмуаси ҳамда Чағониён кўчасидаги Денов қалъаси оператив бошқарув ҳуқуқи асосида музей-қўриқхонага берилади.
Музей-қўриқхона ўз фондини Сурхон воҳаси тарихи, маданияти ва этнографияси, дастлабки кўриниши ва ўша давр муҳитини акс эттирувчи қадимий қўлёзма ва тошбосма китоблар, тарихий далил ва ҳужжатлар, археологик топилмалар, осори-атиқалар, замонавий илмий-тадқиқот ишлари, китоб ва тўпламлар, видео ва фото ҳужжатлар ҳисобидан шакллантиради.
Саид Оталиқ меъморий мажмуаси 2-қаватида ҳунармандлар маркази ташкил этилади. Бу ҳақида Ахборот ва оммавий коммуникациялар агентлиги Сурхондарё вилояти ҳудудий бошқармаси хабар бермоқда.
