Жиззах вилоятида фаолият кўрсатувчи бир гуруҳ тадбиркорлик субъектлари уларга нисбатан ноқонуний равишда қарздорлик ҳисобланганлиги ва улар асоссиз газ тармоғидан узилганлигидан норози бўлиб, Бизнес-омбудсманга мурожаат қилди.

Аниқланишича, «Ҳудудгаз Жиззах» ходимлари томонидан табиий газ сарфини ҳисобга олувчи «Фосса» дастурига юқоридаги тадбиркорлик субъектларининг ҳисобига қарийб 903 миллион сўмлик нореал қарздорлик киритилган.

Ушбу ҳолат юзасидан Бизнес-омбудсман томонидан «Ҳудудгаз Жиззах» газ таъминоти филиали мансабдор шахслари ва бошқаларнинг ҳаракатларига қонуний баҳо бериш ва уларга нисбатан жиноий иш қўзғатиш таклифи вилоят прокуратурасига юборилди.

Бизнес-омбудсманнинг таклифи бўйича терговга қадар текширув ҳаракатлари амалга оширилиб, натижада «Ҳудудгаз Жиззах» газ таъминоти филиали, «Ҳудудгаз Метрология» филиали Жиззах бўлими мансабдор шахслари ва бошқаларга нисбатан Ўзбекистон Республикаси Жиноят кодексининг 205-моддаси 2-қисми ва 209-моддаси 1-қисми билан жиноят иши қўзғатилди.

Ҳозирда жиноят иши бўйича дастлабки тергов ҳаракатлари олиб бориляпти.