Таъкидланишича, 2024 йил Ўзбекистонда такси бозорини легаллаштириш йўлидаги муҳим босқич бўлди. Солиқ қўмитаси ушбу соҳадаги шаффофликни таъминлаб, агрегаторлар интеграцияси орқали қонуний айланмани ўсишига ва яширин фаолият улушини камайишига эришди.
2024 йил якунларига кўра, 155 та такси агрегатори солиқ органлари ахборот тизимлари билан интеграция қилинган. Ўтган йили апрель ойида 6 та, августда 142 та эди.
Жами 320 млн марта йўловчи ташиш амалга оширилган. Йўловчи ташиш айланмаси 5,9 трлн сўмга етди.
Шундан:
- 4,5 трлн сўм ёки 76,3% – нақд тўловлар;
- 1,4 трлн сўм ёки 23,7% – нақдсиз тўловлар.
- Ўртача битта чек 18 456 сўмни ташкил этган (августда 18 000 сўм).
Агрегаторлар орқали йўловчи ташиш билан 498 мингга яқин ўзини ўзи банд қилган ҳайдовчилар шуғулланмоқда. Ҳайдовчиларнинг ярмидан кўпи (57 фоиз) 30-50 ёшда – 283 680 киши, 30 ёшгача – 179 245 киши (36 фоиз), 50 ёшдан катталар – 35 004 киши (7 фоиз).
Шундан аёл ҳайдовчилар сони деярли 4 баробарга ошган. Ўтган йил бошида 1 053 нафар, йил охирига келиб 4124 нафар аёл фаолият юритмоқда.
Йил давомида такси хизматини кўрсатган 4,7 мингга яқин ҳайдовчи 100 млн сўмдан ортиқ даромад олган:
- 50-100 млн сўм – 23,1 минг ҳайдовчи;
- 10-50 млн сўм – 114,6 минг ҳайдовчи;
- 5-10 млн сўм – 63,5 минг ҳайдовчи;
- 1-5 млн сўм – 136,4 минг ҳайдовчи;
- 1 млн сўмгача – 155,5 минг ҳайдовчи.
Энг кўп фойдаланилаётган автомобиллар:
- Nexia – 17,8%;
- Cobalt – 16,9%;
- Lacetti – 13,9%.
Электромобиллар эса 1,2%ини ташкил этади.
Автомобилларнинг ёши (ишлаб чиқарилган йилига асосланган):
- 1-3 йил – 10,4%;
- 3-5 йил – 9%;
- 5-10 йил – 23,6%;
- 10 йилдан ортиқ – 56,9%.
Агрегаторлар 2024 йилда 156,8 млрд сўм солиқ шундан, ҚҚС 66,2 млрд сўм тўлади.
