Жиноят иши материалларига кўра, 1 февраль куни Бўзбозор кўчасида 26 ёшли А.А. «жамиятдаги хулқ-атвор қоидаларига, умумэътироф этилган ахлоқий меъёрларга қўпол тарзда бепарволик билан» муносабатда бўлиб, олдидан ўтиб кетаётган 17 ёшли қизга нисбатан қўпол ва одобсиз ҳаракатлар содир этган. Унинг орқасидан ушлаб, қиз қаршилик кўрсатгач, юзига уриб, воқеа жойидан қочиб кетган.
Суд-тиббий экспертизаси қизнинг пастки лаб соҳасида жароҳатлар аниқлаган ва уларни енгил жароҳатлар сифатида баҳолаган.
Айбланувчи ўз айбини тўлиқ тан олди ва турмушидан ажрашганидан сўнг «янги ҳаёт қуришга интилганини» айтди. Унинг сўзларига кўра, ўша куни у жабрланувчи қизни кўрган ва «биринчи у билан танишиб, кейин турмуш қуриш»ни хоҳлаган, шунинг учун унга эргашиб, нимадирлар деган.
Йигитнинг таъкидлашича, у тасодифан қизга яқинлашиб, «белдан паст жойини ушлаб олган». Қизнинг сўзларига кўра, у ўша жойга уриб, кейин ушлаб олган. Қиз қаршилик кўрсатган пайтда ҳужум қилган шахснинг телефони ерга тушиб кетган, шундан сўнг айбланувчи унинг юзига мушти билан урган, қиз эса зарбадан ерга қулаган.
А.А. қизни нима сабабдан урганини изоҳлай олмади, лекин бундан афсусда эканини айтди. Жабрланувчининг сўзларига кўра, у воқеа содир бўлгандан бери жуда ёмон руҳий ҳолатда ва кўчада ёлғиз юришдан қўрқади. Унинг фикрича, жамиятда бундай шахсларнинг мавжудлиги барча қизларнинг ҳаёти ва соғлиғига хавф туғдириши мумкин. Жабрланувчи судланувчини кечирмади ва бу бошқаларга ўрнак бўлиши учун суддан энг оғир жазо тайинлашни сўради.
Суд эркакни Жиноят кодексининг 277-моддаси 2-қисми «д» банди (Безорилик, ўз мазмунига кўра умум эътироф этган ахлоқ қоидаларини намойишкорона менсимасликда ифодаланувчи ўтакетган беҳаёлик билан / 300 соатдан 360 соатгача мажбурий жамоат ишлари ёки 1 йилдан 3 йилгача озодликни чеклаш ёхуд 3 йилгача озодликдан маҳрум қилиш билан жазоланади) бўйича айбдор деб топиб, 2 йил 6 ойга озодликдан маҳрум қилиш жазоси тайинлади.
