Қонун билан уяли алоқа виртуал операторлари (провайдерлар) фаолиятини кенгайтириш мақсадида улар томонидан радиотелефон (уяли) алоқа тармоқлари хизматларини кўрсатиши натижасида ундириладиган давлат божи миқдорлари камайтирилади.
Ушбу соҳада фаолият юритиб келаётган тадбиркорлик субъектлари томонидан базавий ҳисоблаш миқдорининг 25 000 баравари миқдорида давлат божи ундирилиши белгилаб қўйиляпти.
Шу билан бирга, агар уяли алоқа виртуал оператори томонидан навбатдаги йиллик давлат божини тўлаш давридан олдинги молия йилида кўрсатилган кўчма радиотелефон (уяли) алоқа тармоқлари хизматларининг қиймати базавий ҳисоблаш миқдорининг 1,5 миллион бараваридан ошган тақдирда, ушбу уяли алоқа виртуал оператори даромадининг 1 фоизи миқдорида қўшимча давлат божи тўланиши белгиланяпти.
Маълумот ўрнида айтиш жоизки, бугунги кунда республикамизда ўз телекоммуникация тармоғига эга 5 та мобил алоқа базавий оператори хизмат кўрсатиб келяпти. Радиочастота ресурсига эга бўлмаган 1 та виртуал мобил алоқа оператори мавжуд.
Сенаторларнинг таъкидлашича, Қонуннинг қабул қилиниши натижасида уяли алоқа виртуал операторлари фаолиятини кенгайтиришга ва уларнинг фаолият кўрсатиши учун адолатли рақобат муҳити яратишга эришилади.
Сенат Раисининг сўзларига кўра ушбу Қонунни ҳам соҳадаги тадбиркорликни янада ривожлантириш, мавжуд муаммоларни ечишга қаратилган навбатдаги қадам деб кўриш мумкин.
Жумладан, ўзини мустақил алоқа тармоғига эга бўлмаган уяли алоқа виртуал операторларга (провайдер) лицензия берганлик учун давлат божи миқдорини юқорилиги мазкур соҳада тадбиркорлик фаолияти бозор қоидалари асосида ривожланишини чеклаб қўяди.
Давлат божини сезиларли камайтирилиши соҳадаги тадбиркорлар ихтиёрида қўшимча маблағлар қолиши билан бирга, тақдим этилаётган имтиёзлар виртуал мобил алоқа бозорининг инвестициявий жозибадорлигини оширишга ва мамлакатимизда янгидан янги хорижий инвестициялар киритиш орқали телекоммуникация тармоқларини модернизация қилиш учун имкон беради.
Мазкур рағбатлантириш чоралари орқали тадбиркорлик субъектларига енгиллик берилиб, хусусий телерадиоканаллар ташкил этилишига ва теледастурларни сифатли контентлар билан тўлдиришга эришилади.
Таҳлилларга кўра, ҳудудлардаги хусусий телеканал ва радиоканаллар ўз телерадиодастурларини эфирга узатиш ҳамда моддий-техник базаларини замонавий ускуналар билан жиҳозлашда айрим молиявий қийинчиликларга дуч келяпти.
Шу боис Қонун билан телерадиоэшиттиришларни тарқатиш (намойиш этиш) тармоқларини лойиҳалаштирганлик, қурганлик, улардан фойдаланганлик ва уларнинг хизматларини кўрсатганлик учун тўланадиган давлат божи миқдорлари 50 фоизга камайтириляпти.
Бунда теле- ва радиоканалларнинг молиявий имкониятларини яхшилашга, яъни 4,1 миллиард сўмга яқин пул маблағларини хусусий телерадиоэшиттириш субъектлари фаолиятини ривожлантиришга эришилади.
Қонун билан давлат божини ундиришда яна бир қўшимча имтиёз берилиб, унга кўра, йиллик ундириладиган давлат божининг миқдори тенг равишда йилнинг ҳар чорагида бўлинган ҳолда тўлаш механизми яратилади.
Сенаторлар ушбу Қонуннинг қабул қилиниши тадбиркорлик субъектларига енгиллик бериш билан бирга, хусусий телерадиоканаллар ташкил этилишига ва теледастурларни сифатли контентлар билан тўлдиришга хизмат қилишини таъкидлаб ўтдилар, деб хабар беради Олий Мажлис Сенати матбуот хизмати.
Қизғин муҳокамадан сўнг Қонун сенаторлар томонидан маъқулланди.
