Ижтимоий тармоқларда Уйчи туман ҳокимлиги давлат харидларини амалга оширишда аффилланганлик ҳолатига йўл қўйганлиги тўғрисида тарқалган хабар Коррупцияга қарши курашиш агентлиги томонидан ўрганилди.
Ўрганишда ҳокимлик томонидан давлат бюджети маблағларини сарфлашда туман ҳокимининг 2022 йил 27 майдаги Фармойиши талаблари бажарилмагани, шунингдек, компьютер воситалари сотиб олиш учун ўтказилган энг яхши таклифни танлаб олиш бўйича давлат харидида аффилланганлик ҳолати аниқланди.
Жумладан, туман ҳокимининг юқорида келтирилган Фармойишида 121,4 миллион сўм маблағлар ёшлар етакчиларига шароит яратиш мақсадида мебель жиҳозлари сотиб олиш учун ажратилган бўлса-да, биргина ҳолатда 7,2 миллион сўмга компьютер воситаси сотиб олинган.
Шунингдек, компьютер воситасини харид қилиш бўйича ўтказилган ушбу давлат харидида қатнашган барча иштирокчи корхоналар ягона шахсга тегишли бўлган.
Юқоридаги ҳолатлар бўйича Aгентлик Уйчи туман ҳокимлигига тақдимнома киритди ва ҳокимлик томонидан ушбу харид бекор қилинди. Бу ҳақида Коррупцияга қарши курашиш агентлиги Ахборот хизмати хабар бермоқда.
