Олис ҳудудларга суюлтирилган газ тўлиқ ҳажмда ва маҳаллий ҳокимият томонидан тасдиқланган график асосида етказилмоқда. Ҳудудларда авария ҳолатлари кузатилганда, мутахассислар жойига юборилмоқда ва улар муаммоларни бартараф этишмоқда.

2023 йилнинг 9 декабрь куни газ таъминоти ташкилотлари томонидан аҳоли ва улгуржи истеъмолчиларга 105 миллион куб метр табиий газ етказиб берилди. Бундан ташқари суюлтирилган газ истеъмолчиларига 2 224 тонна ёқилғи етказилган.

Муаммолар кузатилган жойларда газ таъминотини яхшилаш борасида соҳа мутахассислари томонидан катта кўламли ишлар амалга оширилмоқда. Тошкент шаҳар Яккасарой тумани Юнус Ражабий кўчасидаги авария ҳолати бартараф этилди, айни вақтда унга қўшни бўлган В.Воҳидова ва Тафаккур кўчаларидаги газ қувурларида юзага келган носозликлар бартараф этилмоқда. 7 декабрь куни сув таъминоти тизими ходимлари авария ҳолатини бартараф этиш жараёнида трактор орқали газ қувурларига шикаст етказган. Натижада газ қувурларига сув йиғилган ва учта кўчада газ босими пасайиши кузатилган. Айни вақтда «Ҳудудгаз Пойтахт» газ таъминоти филиали ходимлари томонидан таъмирлаш ишлари олиб борилмоқда.

Тошкент вилояти Пискент тумани «Оқ тепа» МФЙдаги газ қувурларида авария ҳолати кузатилган. Юк автомобили ўрта босимли газ қувурига шикаст етказган, натижада 70 та хонадон вақтинча газ таъминотидан узилган. «Ҳудудгаз Тошкент» газ таъминоти филиали мутахассислари авария оқибатларини бартараф этишди.

Қашқадарё вилояти Қарши шаҳридаги «Бўстон» ва «Узумзор» МФЙларидан ўтувчи ўрта босимли газ қувурида таъмирлаш-тиклаш ишлари олиб борилди. «Ҳудудгаз Қашқадарё» газ таъминоти филиали мутахассислари тўрт соат ичида муаммони бартараф этишди ва истеъмолчилар учун газ таъминотини қайта тиклашди.

Бухоро вилоятининг Шофиркон туманида ҳам авария ҳолати бартараф этилди. «Тезгузар», «Бобохайдар», «Пашмон», «Мирзоқул», «Зарчабек», «Калмакон», «Шодлик», «Саврак», «Бобур» ва «Хўжа Ориф» МФЙларини табиий газ билан таъминловчи ер ости газ қувурида газ сизиб чиқиши ҳолати аниқланди. «Ҳудудгаз Бухоро» газ таъминоти филиали мутахассислари носозликни бартараф этишди. Газ таъминоти қайта тикланди.

Шунга ўхшаш ҳолат Бухоро вилоятининг Жондор туманида ҳам содир бўлди. «Пулоти» МФЙдан ўтувчи ўрта босимли газ қувурига трактор томонидан шикаст етказилгани натижасида 350 та истеъмолчи вақтинча газ таъминотидан узилиб қолган. Айни вақтда авария ҳолатини бартараф этиш жараёнлари якунланган.

Ноқулай об-ҳаво шароитларига қарамай истеъмолчиларнинг газ таъминотини яхшилаш ишлари давом эттирилмоқда. Мазкур даврда алоҳида маҳалла ва хонадонларда газ етишмовчилигини олдини олиш мақсадида, «Ҳудудгазтаъминот» АЖ фуқаролардан газ жиҳозларидан фақат бирламчи заруриятлар учун фойдаланишни, уйдан чиқиб кетаётганда имкон қадар иситиш жиҳозларини ўчиришни сўрайди.

Фурсатдан фойдаланиб, «Ҳудудгазтаъминот» АЖ табиий газни узлуксиз етказиб бериш учун тўловни ўз вақтида амалга ошириш зарурлигини эслатиб ўтади. Тўловларни туман газ таъминоти бўлимлари ва банк филиалларида, шунингдек, барча тўлов тизимларининг мобил иловалари орқали 24/7 режимида амалга ошириш мумкин.

«Ҳудудгазтаъминот» АЖ тизими мутахассислари барча таклифлар, шикоятлар ва мурожаатларни 1104 телефон рақами орқали, газ сизиб чиқиши ҳолатлари, фавқулодда вазиятларни ва бошқа техник муаммоларни бартараф этиш бўйича аризаларни 104 рақами орқали қабул қиладилар.