Илажға факультет деканларының ҳаял-қызлар мәселелери бойынша мәсләҳәтшилери, студент-қызлар ҳәм ғалаба хабар қуралларының ўәкиллери қатнасты.
Дөгерек сәўбет форматында өткерилген ашық сәўбетлесиўде институттың мектепке шекемги билимлендириў кафедрасының доценти Лизахан Ибрагимова, ҳаял-қызлар мәселелери бойынша мәсләҳәтшилер Сулыўхан Палўаниязова ҳәм Нодира Алламбергеновалар шығып сөйлеп, ҳәзирги ўақытта ҳаял-қызлардың ҳуқықларын қорғаў, илим, билимлендириў ҳәм исбилерменлик тараўларындағы жумысларын раўажландырыўға бағдарланған көплеген басламалар менен бағдарламалар әмелге асырылып атырғанлығын атап өтти.
Әсиресе, мәмлекетимиз басшысының тиккелей басламасы менен ҳаял-қызларды билимлендириў ҳәм кәсиплик жақтан раўажландырыў, олардың бәнтлигин тәмийинлеў, саламатлық ҳәм ҳуқықый жақтан қоллап-қуўатлаў, сиясий ҳәм жәмийетлик белсендилигин арттырыўға мәмлекетлик дәрежеде дыққат қаратылмақта.
Бүгинги күнде институтта 700 ге шамалас профессор-оқытыўшылар жумыс ислеп атырған болса, солардан 300 ге шамаласы ҳаял-қызлардан ибарат. Олардың арасынан 17 илим докторы ҳәм профессорлар, 97 илим кандидаты ҳәм философия докторлары, 38 үлкен оқытыўшы ҳәм 150 ассистент ҳәм стажёр-оқытыўшылар жаслар тәлим-тәрбиясында ерлер менен бир қатарда теңдей мийнет етип, қәнигели педагог кадрлар таярлаўға мүнәсип үлеслерин қоспақта. Соның менен бирге, 240 қа шамалас ҳаял-қызлар ҳәр қыйлы қәнигеликлер менен бөлимлерде аянбай мийнет етпекте.
Институтта улыўма 16 мыңға шамалас студент ҳәм магистрантлар оқып атырған болса, соннан 12 мыңға шамаласы ҳаял-қызлар болып табылады. Олардың ҳуқықлары менен мәплерин қорғаў, оқыў ҳәм илимий-изертлеў, жәмийетлик жумыслардағы белсендилигин арттырыў мақсетинде үгит-нәсият және әмелий жумыслар турақлы түрде әмелге асырылмақта.
Илажда мәмлекетимизде ҳаял-қызлардың билим алыўы ушын қосымша имканиятлар жаратыў, олардың кәсиплик шеберликлерин арттырыў мақсетинде жолға қойылған арнаўлы курслар ҳәм тренинглер ҳаққында мағлыўматлар берилди.
Атап айтқанда, Президентимиздиң пәрманы тийкарында қарақалпақстанлы жаслар ушын жоқары оқыў орынларына қосымша 10 000 орынлық квота ажыратылғанлығы, магистратура қәнигеликлеринде төлемли контракт тийкарында оқып атырған ҳаял-қызлардың контракт төлемлерин мәмлекетлик бюджет қаржылары есабынан қаплап бериў тәртиби енгизилгенлиги, ижарада жасайтуғын студентлер ушын ижара төлеминиң ярымы мәмлекетлик бюджет есабынан төлениўи жолға қойылғанлығы, «Ҳаял-қызлар дәптери», «Темир дәптер» ҳәм «Жаслар дәптери» системасы тийкарында социаллық жәрдемге мүтәж ҳаял-қызлар және усындай шаңарақлардың перзентлери ушын қосымша имканиятлар жаратылып атырғаны анық мысаллар тийкарында көрсетип өтилди.
Ашық сәўбетлесиў жуўмағында ҳаял-қызлар мәсләҳәт кеңеси ағзалары институтта усы форматта республикалық конференция шөлкемлестириў бойынша алдағы исленетуғын жумысларды келисип алды.
Қарақалпақстан хабар агентлиги.
