Жараён йирик майдалаш цехи бошлиғи Бахтиёр Эшбоевнинг ОКМК бош муҳандиси Сергей Ларионовга цех маъданини қабул қилишга тайёр эканлиги борасидаги ҳисоботидан бошланди.
Шундан сўнг, маълумот маъдан қабул қилиш цехи бошқарув пульти операторига етказилди ва цехга кон транспортлари томонидан келтирилган маъдан туширила бошланди. Бунда "Ёшлик I" конидан келтирилган маъдан шу коннинг ўзида жойлашган йирик майдалаш цехининг 1-босқич майдалаш узелининг қабул қилувчи бункерларига юкланди. Ҳар бир бункер бир вақтнинг ўзида 2 тадан кон транспортини қабул қилиш имкониятига эга. Шундан сўнг маъдан ККД-1500/200 (180)М-2П русумли конусли йирик майдалагичларда маъдан 300-350 мм гача катталикда майдаланди.
Кейинги босқичда йирик майдаланган хомашё 6 та пластинкали таъминлагичлар ёрдамида тасмали конвейерлар орқали узунлиги 4200 метрни ташкил этувчи 2 та магистраль конвейерларга келиб тушди. Ўз навбатида, ҳар бири 1500 киловатт қувватига эга бўлган 4 та электр двигателлари билан жиҳозланган ушбу конвейерларининг ҳар иккаласи соатига 6500 тоннадан маъданни, секундига 4 м тезликда "Ёшлик I" конидан 3-Мис бойитиш фабрикасида жойлашган умумий сиғими 320 минг тонна бўлган йирик майдаланган маъдан омборига етказиб беради.
Ушбу омбордан маъдан қуруқ ғалвирлаш бўлимига юборилади ва регламентга мувофиқ технологик жараённинг кейинги босқичларига узатилади.
Жорий йилнинг 29 март куни тарихий воқеа рўй берди. 3-Мис бойитиш фабрикасининг илк концентрати олинди. Мазкур тарихий жараёнда ОКМК бошқарув раиси Абдулла Хурсанов, комбинат масъуллари иштирок этишди.
Таъкидлаш жоизки, конда ҳудди шундай яна 2 та иншоот, биринчи ва иккинчи майдалаб-юклаш мажмуалари қурилиши якунланиб, фойдаланишга топширилиш арафасида. Аҳамиятлиси, 3-МБФнинг технологик жараёнлари айнан кондан бошланади. Яъни, 1500 мм катталикгача бўлган маъданлар ушбу қурилмаларда бирламчи майдалашдан ўтади.
Мажмуада кон транспортларидан маъданни тўкиш жараёнида атроф-муҳитга чанг кўтарилиб экологияга зарар етказилишининг олдини олиш мақсадида тўлиқ автоматлаштирилган юқори босим остида сув пуркаш тизими жорий этилган. Бу келгусида "Ёшлик I" конини "яшил" кон деб эътироф этилиши учун хизмат қилади.
Шу кунларда 3-Мис бойитиш фабрикасида ишлаб чиқариш бўлинмаларини, технологик линияларини ва автоматлаштирилган бошқарув тизимини босқичма-босқич ишга тушириш ишлари жадал амалга оширилмоқда.
Ҳамкорлик материали
