9 февраль куни пойтахтимиздаги Адиблар хиёбонида буюк шоир, мутафаккир, сўз мулкининг султони Ҳазрат Алишер Навоий таваллудининг 584 йиллигига бағишланган адабий-маърифий тадбир ўтказилди.
Айтиш жоиз, бу йилги тадбир ўзгача тайёргарлик, кўтаринки руҳ билан ўтди, бир қанча хорижий меҳмонларнинг иштироки ва Ҳазрат Навоийга ҳурмат ҳамда ихлосининг исботи сифатидаги самимий табрик сўзлари йиғилганларга манзур бўлди.
Тадбирда қатнашган Венгриянинг Ўзбекистондаги элчиси Ёжеф Рожа ҳам йиғилганларга ўзининг самимий тилакларини айтиб, Венгрия ва Ўзбекистоннинг кенг қамровли алоқалари келажакда янги уфқлар очишига ишонч билдирди.
— Дунёга донг таратган буюк шоир — Навоий ҳазратлари таваллудининг 584 йиллигини нишонлашда қатнашаётганим, бу ерга келганимдан хурсандман, — дейди Ёжеф Рожа. — Ўзбекистон шундай буюк шоири билан фахрланса арзийди. Шарқшунос, тилшунос олим, Венгрия Фанлар академияси аъзоси Ҳерман Вамбери Мулла Исъҳоқ кўмагида Навоийнинг ноёб асарларини ўрганиб, венгер халқига бу маънавий меросни туҳфа этишга бел боғлаган эди. Уларнинг катта меҳнати билан венгер халқи бу хазинадан баҳраманд бўлди. Ҳозирда Венгрияда Навоий ғазалларини таржима қилиш, шунингдек, Заҳириддин Муҳаммад Бобурнинг «Бобурнома» асарини венгер тилида нашр этиш бўйича ишлар бошланган. Венгрия ва Ўзбекистон ўртасидан ўзаро ҳурмат, олий даражадаги дўстлик ва ҳамкорлик алоқаларини алоҳида таъкидлашни истардим. 2024 йил Венгрияда Навоий ҳайкали ўрнатилгани ўзбек халқига ҳурмат ва дўстликнинг яққол ифодасидир.
Муҳташам Адиблар хиёбони кенг жамоатчилик вакиллари билан гавжум бўлди. Жонли ижродаги оркестрлар жамоаси иштироки, куй-қўшиқлар, саҳна кўринишлари тадбирга файз қўшди. Турли мутасадди ташкилотлар ушбу тантанали тадбирда иштирок этиб, буюк аллома, ўзбек адабий тили асосчиси Алишер Навоий ҳайкали пойига гулчамбарлар қўйди.
Жорий йил 7 февраль куни «Буюк шоир ва мутафаккир Мир Алишер Навоий ижодий меросини юртимиз ва жаҳон миқёсида кенг тарғиб қилиш ҳамда Навоий вилоятида «Алишер Навоий йили»ни юқори даражада ўтказиш чора-тадбирлари тўғрисида»ги Президент қарори қабул қилинган эди. Шу кунларда Осиё, Африка, Европа ва Америка қитъаларидан келган кўплаб таниқли адабиётшунос олим ва тадқиқотчилар мамлакатимиз илм ва адабиёти аҳли билан биргаликда Навоий вилоятида бўлиб ўтаётган «Навоий ва Шарқ Ренессанси» ИВ анъанавий халқаро симпозиумида иштирок этмоқда.
8 февраль куни Президент Шавкат Мирзиёев ушбу анжуман қатнашчиларига табрик йўллади. Мазкур анжуманни Навоий вилоятида, «Алишер Навоий йили» деб эълон қилинган йилда ҳамда унинг таваллуди юртимиз бўйлаб кўтаринки руҳда нишонланаётган шу кунларда ўтказилаётгани халқаро тадбирнинг файзи ва шукуҳини оширмоқда.
Рашид Хўжамов,
«yuz.uz» мухбири
Фото: Ҳаким Йўлдошев.
