Кинематография агентлиги буюртмасига биноан “Ҳужжатли ва хроникал фильмлар киностудияси” ДУК ҳамда Тошкент молия институти билан ҳамкорликда атоқли ёзувчи, "Буюк хизматлари учун" ордени соҳиби Абдулла Қаҳҳор ҳақида ҳужжатли фильм суратга олинмоқда, дея хабар бермоқда Кинематография агентлиги Ахборот хизмати.

“Ҳақиқат мендан устун” ҳужжатли фильмида адибнинг ёшлигини ижро этаётган актёр Отабек Шарипов фильм ҳақидаги таассуротларини сўзлаб берди:

- Абдулла Қаҳҳор ҳақидаги ҳужжатли фильмнинг суратга олиш ишлари Бухоронинг турли ҳудудларида шунингдек, ёзувчининг уй музейида бўлиб ўтди. Умуман олганда буюк сиймоларни экранда яратиш ҳар бир актёрнинг орзуси бўлса керак. Мен ана шу орзуга эришдим.

Биз Абдулла Қаҳҳорнинг фақатгина ижодини билар эканмиз. Энди эса фильм орқали унинг ҳаёти қандай кечганининг гувоҳи бўламиз. Ёзувчининг ўрта ёшли даврини гавдалантирганимда унинг ҳаётидаги машаққатларини, чеккан заҳматларини кўрдим ва ҳис қилдим. Ўйлайманки, адиб билан бир даврда яшаган кўплаб замондошлари ана шундай чиғириқлардан ўтишган. Балким, шунинг учун ҳам ўша даврда залворли, тош босадиган ноёб асарлар яралган.

Фильм сценарийси ҳаётий воқеалар асосида ёзилган. Адиб яшаган давр муҳитини ҳис қилиш, ўша нафасда яшаш ижодий жамоамизда ўзига хос таассурот қолдирди. Съёмка жараёнида адиб фойдаланган қаламдан фойдаланишга тўғри келиб қолди. Унда ёзиш жуда қийин экан. Тасаввур қилинг, олдин маълум асарни қораламасини ёзиш, кейин уни оққа кўчириш, асарлар керак бўлса 18 марталаб қайта кўчирилган. Бу жуда катта меҳнат ва вақт талаб этади.

Абдулла Қаҳҳор ҳақидаги “Ҳақиқат мендан устун” ҳужжатли фильми орқали адиб шахсини янада яхшироқ билдим ва унга яқинлашдим. Кўплаб асарларини ўқиб чиқдим. Энди эса премьерани интиқлик билан кутмоқдаман!”