Фавқулодда вазиятлар вазирлиги воқеа тафсилотларини очиқлади.
Таъкидланишича, бугун эрталаб 9:40 да шаҳар ФВБ га ёнғин тўғрисида хабар келиб тушган.
Шунга кўра, 3 та ёнғин-қутқарув экипажи соат 09:45 да воқеа жойига етиб борган. Соат 09:56 да ёнғин қуршаб олинган ва 09:58 да батамом ўчирилган.
Ёнғин натижасида хонадоннинг айвон (балкон) қисмининг тахминан 18-20 кв.м майдонида ички, шифт қисми ва уй жиҳозлари ёниб зарарланган. Қутқарувчиларнинг тезкор ҳаракатлари натижасида ёнғиннинг қўшни хонадонларга ўтиб кетиши олди олинган.
Ёнғин оқибатида тан жароҳати олган ёки ҳалок бўлган фуқаролар йўқ.
Ҳозирда ёнғиннинг келиб чиқиш сабаби ва келтирилган моддий зарар миқдори аниқланмоқда.
"Юқоридаги каби кўнгилсиз вазиятларнинг олдини олиш мақсадида, Фавқулодда вазиятлар вазирлиги фуқаролардан ёнғин хавфсизлиги қоидаларига риоя этишни сўраб қолади", дейилади хабарда.
