Лойиҳага кўра, экологик ҳуқуқбузарликка, шу жумладан атмосфера ҳавоси ифлосланишига қарши курашиш ва аниқланган ҳуқуқбузарликларни расмийлаштириш учун Тошкент шаҳрида синов-тажриба тариқасида “Экологик патруль” қўшма бўлинмасини ташкил этилади.
Бўлинма Экология ва атроф-муҳитни муҳофаза соҳасидаги қонунчилик талабларининг ижросини таъминлаш борасида профилактик тадбирларни ва назорат ишларини доимий тарзда амалга ошириши кўзда тутилмоқда.
Бўлинма:
— атроф-муҳитни муҳофаза қилиш ва табиий ресурслардан оқилона фойдаланиш соҳасидаги қонунчилик ҳужжатлари талаблари бузилишининг олдини олиш, уни аниқлаш ва унга чек қўйиш;
— атроф-муҳитнинг ҳолатини кузатиб бориш, атроф-муҳитнинг ифлосланишига, табиий ресурслардан нооқилона фойдаланилишга олиб келиши, фуқароларнинг ҳаёти, соғлиғи ва мол-мулкига хавф солиши мумкин бўлган вазиятларни аниқлаш;
— экология, атроф-муҳитни муҳофаза қилиш ва табиий ресурслардан фойдаланишга доир тарғибот-ташвиқот ва ҳуқуқбузарликлар профилактикасини амалга ошириш, шунингдек, браконьерликка қарши курашиш;
— табиатни муҳофаза қилиш ва табиий ресурслардан оқилона фойдаланиш соҳасидаги қонунчилик талаблари бузилишининг олдини олиш, уни аниқлаш ва унга чек қўйиш учун таъсирчан чораларни қўллаш;
— аҳоли пунктлари, кўчалар, истеъмол бозорлари, йирик савдо мажмуалари, туризм намойиши объектлари ва бошқа жамоат жойларининг ҳамда корхона ва ташкилотларнинг туташган ҳудудларининг тозалиги ва экология ҳолати устидан доимий назоратни амалга ошириш;
— экологик ҳуқуқбузарликка, шу жумладан атмосфера ҳавоси ифлосланишига қарши курашиш бўйича давлат экологик назоратини куну тун амалга ошириши каби вазифалар белгиланмоқда.
Ички ишлар ва Экология, атроф-муҳитни муҳофаза қилиш ва иқлим ўзгариши вазирлиги “Экологик патруль” қўшма бўлинмаси фаолиятига раҳбарлик қилади.
Бўлинма раҳбари Экология, атроф-муҳитни муҳофаза қилиш ва иқлим ўзгариши вазири томонидан лавозимга тайинланади ва озод қилинади, мақоми бўйича тегишли равишда Экология, атроф-муҳитни муҳофаза қилиш ва иқлим ўзгариши вазирлиги марказий аппаратининг бошқарма бошлиғи лавозимига тенглаштирилади.
Ички ишлар ва Экология, атроф-муҳитни муҳофаза қилиш ва иқлим ўзгариши вазирлиги билан биргаликда 2025 йил 1 майга қадар Бўлинмада умумий ходимлар сони 100 та штат бирлиги ташкил қилади.
