25-апрелда Ўзбекистон Энергетика вазири Ж.Мирзамаҳмудов кўргазма доирасида Татаристон Республикасининг қатор йирик компаниялари раҳбарлари билан учрашув ўтказди.
Учрашувда Татаристон Республикасининг 10 дан ортиқ компания вакиллари билан юқори кучланишли электр тармоқларини қуриш, кабель маҳсулотларини ишлаб чиқариш, нефть-газ соҳасида компрессор ва насос станцияларини етказиб бериш, электромобиль ва электробусларни зарядлаш станцияларини ўрнатиш ва бошқа бир қатор йўналишларда музокаралар бўлиб ўтди.
Музокаралар якунида томонлар қўшма йўл харитаси ишлаб чиқиш бўйича келишиб олдилар, деб хабар беради Энергетика вазирлиги матбуот хизмати.
Маълумот учун: Кўргазмада турли давлатларнинг 300 дан ортиқ компаниялари иштирок этяпти. Ўзбекистон, Россия ва Беларус давлатлари эса миллий экспозицияларини намойиш этяпти. Кўргазма доирасида бугунги кунга қадар 30 дан зиёд йирик ишбилармонлик тадбирлари ва 500 дан ортиқ учрашувлар ўтказилди.
