Бу ҳақда Reuters агентлиги МАГАТЭ ҳисоботига таяниб хабар берди.
Унга кўра, Эрон яқин ҳафталарда Фордо объектида 174 та IR-6 центрифугали 8 та каскадни ўрнатишни режалаштирмоқда, 11 июнь ҳолатига кўра, иккита каскад аллақачон ўрнатилган. Теҳрон шунингдек, Натанзедаги иншоотга 18 та IR-2M центрифугаларини ўрнатишни режалаштирмоқда, дейилади хабарда.
Аввалроқ Теҳронни агентлик билан етарли даражада ҳамкорлик қилмаётганликда айблаб танқид қилган МАГАТЭ Бошқарувчилар кенгашининг янги резолюциясига жавобан Эрон Натанзе ва Фордо ядровий майдонларида “бир қатор чоралар” кўргани маълум қилинган эди.
Резолюция Буюк Британия, Германия ва Франция томонидан таклиф қилинган.
МАГАТЭ раҳбари Рафаэль Гроссининг таъкидлашича, агентлик Эрон ядровий дастурининг “мутлақ тинч ҳолатда” эканини ҳали тасдиқлай олмайди. Шу билан бирга, у ташкилотда Теҳроннинг ядровий қурол яратиш режаларини кўрсатадиган ҳеч қандай маълумот йўқлигини тан олди, деб хабар беради report.az.
