Фарғона вилоят ҳокими Хайрулло Бозоров университетнинг педагогика ва психология факультетида янги ўқув йили очилишига бағишланган тантанали тадбирда иштирок этди.
Вилоят ҳокими ўз сўзида профессор-ўқитувчиларни ва талабаларни янги ўқув йили билан қутлади. Давлатимиз раҳбарининг “Нажот – таълимда, нажот – тарбияда, нажот – билимда” деган сўзларини иқтибос қилиб келтирган вилоят ҳокими, мустақиллигимизни мустаҳкамлаш, юртимиз қудратини оширишда энг муҳим омиллар бу – ёшларимизга юқори сифатли таълим олишлари учун барча шароитларни яратиш ҳамда улар онгига миллий қадриятларимизни, ватанпарварликни, ғурур ва ифтихорни сингдириш эканини қайд этди. Ҳар бир ёш юрт учун хизмат қилиш, унинг равнақига билим ва куч-ғайратини сарфлаш ҳаётда асосий мақсади бўлишлигини билдирди. Вилоят ҳокими талабаликка қабул қилинган икки юздан зиёд ёшларга Мустақиллик дарсини ўтди.
Тадбирда сўз олган ФарДУ ректори Баҳодиржон Шермуҳаммадов истиқлол айёмининг 33 йиллиги ва янги ўқув йили бошланиши муносабати билан олийгоҳ жамоаси ҳамда талабаларни муборакбод этди.
"Жорий йил олийгоҳ фаолиятида сифатли таълим йўналишининг янги ғояси - Муҳтарам Президентимиз Шавкат Миромонович Мирзиёев илгари сураётган “Нажот – таълимда, нажот – тарбияда, нажот – билимда” тамойили барчамиз учун катта ҳаракатлантирувчи куч бўлади"- дея таъкидлади ректор ўз сўзида.
Тадбир давомида университетнинг бир гуруҳ устозларига илмий унвонлар, диплом ва эсдалик совғалари топширилди.
Тест имтиҳонларида энг юқори баллни олган бир гуруҳ талабаларнинг ота-оналари ташаккурнома билан тақдирланди.
