АҚШ Президенти Дональд Трамп ва “Еттилик” гуруҳи (G7, катта еттилик) давлатларининг бошқа етакчилари кутилмаганда Яқин Шарқдаги мавжуд вазият бўйича қўшма баёнотга келишиб олди. Саммит ташкилотчиси Канада томонидан 16 июнь, душанба куни кечқурун эълон қилинган ҳужжат матнида Эрон “минтақавий беқарорлик ва террорнинг асосий манбаи” деб аталиб, Исроилнинг ўзини ҳимоя қилиш ҳуқуқига урғу берилган. G7 давлат ва ҳукумат раҳбарлари, шунингдек, Эрон ҳеч қандай шароитда ядровий қуролга эга бўлишига йўл қўйилмаслиги ҳақидаги узоқ вақтдан бери маълум бўлган позициясини яна бир бор таъкидлади.

Қўшма баёнот Оқ уй Трампнинг Яқин Шарқдаги инқироз туфайли Вашингтонга эрта қайтиши ва саммитнинг иккинчи кунида иштирок этишдан бош тортишини эълон қилганидан бир неча соат ўтиб келишиб олинди, деб хабар беради dw.com.

Айни пайтда Дональд Трампнинг ўзи Truth Social платформасида Франция Президенти Эммануэль Макрон таъкидлаганидек, Вашингтонга “Исроил ва Эрон ўртасидаги ўт очишни тўхтатиш” туфайли қайтмаганини ёзди ва уни ёлғон маълумот тарқатишда айблади. “Тўғри эмас! Нима учун ҳозир Вашингтонга кетаётганимни у билмайди, лекин бунинг ўт очишни тўхтатишга ҳеч қандай алоқаси йўқ”, деб ишонтирди Трамп. Унинг сўзларига кўра, гап “жуда муҳимроқ” нарса ҳақида кетмоқда. “Атайинми ёки йўқми, Эммануэль ҳар доим нотўғри тушунади”, деб қўшимча қилди АҚШ Президенти.