Hindustan Timesнинг Ҳиндистон Қуролли кучлари вакилига таяниб хабар беришича, ҳинд ҳарбийлари ҳеч қандай сабабсиз босқинга “самарали, назоратли ва ўлчовли жавоб берди”. “Вазият назорат остида ва яқиндан кузатиб борилмоқда. Ҳиндистон армияси назорат чизиғи бўйлаб тинчликни сақлаш учун Ҳиндистон ва Покистон қуролли кучлари ўртасида 2021 йилда эришилган ўзаро англашув тамойилларига амал қилиш муҳимлигини яна бир бор таъкидлайди”, деди армия вакили.
Маҳаллий ОАВ маълумотларига кўра, Покистон аскарларининг Жамму ва Кашмирдаги Ҳиндистон ҳудудига бостириб кириши билан боғлиқ ҳодиса республика ички ишлар вазири Амит Шоҳнинг 7-8 апрель кунлари минтақага ташрифидан бироз олдин содир бўлган. Маълумотларга кўра, Покистон қўшинлари Ҳиндистонга Покистонпараст сепаратист гуруҳлардан террорчи гуруҳларнинг кириб келишини таъминлаш учун назорат чизиғи бўйлаб кескинликни қўзғатган бўлиши мумкин. Айни пайтда Пунч секторида кенг кўламли аксилтеррор операцияси олиб борилмоқда.
Кашмир Ҳиндистон ва Покистон ўртасида 1947 йилда Британия Ҳиндистони мустақилликка эришгач, диний қарашлар бўйича икки давлатга бўлинганидан бери давом этаётган ўткир баҳс мавзуси бўлиб келмоқда. Кашмирнинг давлат чегараси йўқ, унинг ҳудуди Ҳиндистон ва Покистон ўт очишни тўхтатиш режимига риоя қиладиган назорат чизиғи билан бўлинган. Ҳиндистон қисмида эса уни мамлакатдан ажратиш тарафдори бўлган гуруҳлар фаоллик кўрсатиб келмоқда. Янги Деҳли Покистонни экстремистларни қўллаб-қувватлашда айблайди, Исломобод бу айбловни рад этади, деб хабар беради tass.ru.
