Хусусан, Германия-Ўзбекистон бизнес форуми доирасида «Иссиқлик электр станциялари» АЖ ва «Siemens Energy» ўртасида Бухоро шаҳар 3-сонли иссиқлик таъминоти қозонхонасида ва Muborak IEM корхонасида энергосамарадор газ турбинаси ўрнатиш бўйича иккита лойиҳа доирасида 72 миллион евро миқдорида шартнома имзоланди.
Юртимизда когенерация технологияларини жорий этиш йўналишида амалга оширилаётган ишларнинг узвий давоми сифатида баҳоланаётган мазкур лойиҳага кўра, Бухоро шаҳрининг 3-сонли иссиқлик таъминоти қозонхонасида ва Muborak IEM корхонасида ҳар бирининг қуввати 54 МВтга тенг бўлган иккитадан, жами 4 та газ турбина ўрнатилади.
Мазкур лойиҳаларнинг ишга туширилиши мамлакатимизда ишлаб чиқариладиган электр энергиясининг умумий қувватини 216 МВтга оширади. Дастлабки ҳисоб-китобларга кўра, бу йилига 1,7 миллион кВт/соат электр энергияси ва 1,5 миллион Гкал иссиқлик энергиясини ишлаб чиқариш имконини беради.
Шунингдек, 80 та янги ишчи ўринлари яратилади. Лойиҳаларни амалга ошириш даврида, республикамизнинг минг нафар малакали мутахассисларини иш билан таъминлаш имконияти пайдо бўлади, деб хабар беради Энергетика вазирлиги матбуот хизмати «Иссиқлик электр стансиялари» АЖ матбуот хизмати ахборотига таяниб.
