Бош прокуратура ҳузуридаги Департаментнинг Оқдарё туман бўлими томонидан туман ДХХ ва ИИБ ходимлари ҳамкорлигида олинган тезкор маълумотларга асосан ўтказилган тезкор тадбирда “Лойиш” МФЙ ҳудудидаги хонадонда яшовчи Э.Х. ўз уйида қўлбола усулда алкоголь маҳсулотлари ишлаб чиқариб сотаётганлиги аниқланиб, ушбу хонадондан 5 хил турдаги 2 086 дона ароқ, 786 дона “Старий Самарканд” номли коньяк, 330 литр спирт, алкоголни филтрловчи махсус кўмир ва бошқа ишлаб чиқаришда фойдаланилган ускуналар ашёвий далил сифатида олинган.
Департаментнинг Янгийўл туман бўлими томонидан ИИБ ЖҚБ ходимлари билан ҳамкорликда ўтказилган тезкор тадбирда фуқаро А.Т. ўз уйида қалбаки акциз маркалардан фойдаланиб, алкоголь маҳсулотларини сотиш мақсадида ишлаб чиқараётганлиги аниқланиб, 6 хил турдаги 130 дона қўлбола усулда тайёрланган ароқ, жами 55 литр ярим тайёр ароқ ва коньяк ҳамда 1 150 дона қалбаки акциз маркалар ва бошқа ишлаб чиқаришда фойдаланилган ускуналар ашёвий далил сифатида олинган.
Шу каби, Департаментнинг Қизириқ туман бўлими томонидан ўтказилган тезкор тадбирда Сариосиё туманида фаолият юритувчи “Ф.Р.” хусусий корхонасига қарашли дўкон сотувчиси Т.Б. харидорга “Lider” номли алкогол маҳсулотини сотган вақтида ушланиб, ушбу савдо дўкони ва омборхонасидан қалбаки акциз маркали 8 хил турдаги 319 дона истеъмолга яроқсиз алкоголь маҳсулотлари ашёвий далил сифатида олинган.
Мазкур ҳолатлар юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) ва 186-1-моддаси (этил спирти, алкоголли маҳсулот ва тамаки маҳсулотини қонунга хилоф равишда ишлаб чиқариш ёки муомалага киритиш) билан жиноят ишлари қўзғатилиб, тергов ҳаракатлари ўтказилмоқда.
