Бу эса бутун республикамиз ёшларига эътиборнинг намунасидир.
Таъкидлаш керакки, Бухорода 1 млн дан ортиқ ёшлар бўлиб, ойлик доирасида 5 мингдан зиёд ёшлар қамраб олиниши ҳам «Ёшлар ойлиги»нинг самарали ташкил қилинганлигидан дарак беради. Ёшларимиз учун кўплаб танлов ва мусобақаларда, бир-биридан қизиқарли тадбирларда иштирок этиш имконияти яратилди. Бу лойиҳа нафақат шаҳар ва туман марказлари, балки чекка қишлоқларга ҳам кириб борди.
Июнь ойи мобайнида Бухоро вилоятида ёшлар учун бир қанча самарали ишларга қўл урилди. Жумладан, «Янги нафас» оммавий югуриш марафони, шахмат ва шашка мусобақалари уюштирилди. «Раҳбар ва ёшлар» мавзусидаги учрашув қизғин савол-жавобларга бой тарзда ташкил қилинди. «Ёшлар ва қонун» кўрик-танловида иштирокчилар ўзларининг билим ва маҳоратларини намойиш этишди.
«Ёшлар дафтари»га киритилган фуқароларни иш билан таъминлаш, уларни фойдали меҳнатга жалб қилишга ҳар галгидан кўпроқ эътибор қаратилди. Вилоятнинг ҳар бир туман ва шаҳрида «Янги Ўзбекистон ёшлари, бирлашайлик!» шиори остида гала-концертлар уюштирилди. Бунда турли йўналишларда фаолият кўрсатаётган энг сара, фаол, ташаббускор ва иқтидорли ёшларнинг бир гуруҳи вилоят раҳбарияти томонидан тақдирланди.
«Ёшлар ойлиги» доирасида институтимизда «Қувноқлар ва зукколар» кўрик-танловининг «Ректор кубоги» беллашуви ташкил этилди. Шунингдек, ўқишда, жамоатчилик ишларида фаол талабаларга ташаккурнома, эсдалик совғалари тақдим этилди.
Мен Олий Мажлис Қонунчилик палатаси ҳузуридаги Ёшлар парламенти аъзоси сифатида, ишонч билан айтаманки, илм ва касб эгалламоқчи бўлган ука-сингил, тенгдош ёшларга маънан далда бўлиб, қўллаб-қувватлаш учун бор ғайратимни ишга соламан. Бунинг учун эса мен ва мен каби ёшларга чексиз имкониятлар яратиб берилган. Айниқса, ҳар жабҳада юртбошимизнинг қўллаб-қувватлаётганини ҳис этар эканмиз, маррани катта олишдан ва мақсадни улкан қилишдан қўрқмаймиз.
Хулоса қилиб айтганда, Бухорода «Ёшлар ойлиги» қизғин ва тантанали ўтказилди десак, адашмаган бўламиз. Ёшларга берилаётган бу эътибор келгусида ўз натижасини беришига ишонамиз.
Рустамжон Раҳимбоев,
Олий Мажлис Қонунчилик палатаси ҳузуридаги
Ёшлар парламенти аъзоси
Бухоро давлат педагогика институти
ректори ёрдамчиси
