Бу ҳақда "Тошкент метрополитени" ДУК ахборот хизмати маълум қилди.
Бундан 30-40 йил илгари барпо этилган Тошкент метрополитенининг ер ости Миллий боғ, Машинасозлар, Ўзбекистон, Ғафур Ғулом ва Юнус Ражабий бекатларининг иккинчи вестибюлларида қурилиш ишлари охирига етказилмаган ҳолатда фойдаланишга топширилган эди.
Маълумки, метро тизимига бўлган талаб кун сайин ортиб бораётганлиги ва шу боисдан ҳам йўловчиларга қўшимча қулайлик яратиш мақсадида, ўтган йили Тошкент метрополитени қошида очилган "Тошметротранс" МЧЖ лойиҳа институти томонидан барча ёпиқ вестибюлларни ишга тушириш бўйича лойиҳалар ишлаб чиқилиб, давлат экспертизасига топширилди.
Маълумотда айтилишича, ҳозирги кунга келиб, лойиҳалар бўйича тегишли хулосалар олинган бўлиб, қурилишни амалга оширувчи ташкилот аниқланиши учун бу лойиҳа тендерга жойлаштирилган. Жараён босқичма-босқич шаклда амалга ошишини инобатга олган ҳолда, қурилиш ишлари яқин бир ой муддатда бошланади. Қурилишнинг тугаш муддати хусусида эса, қурилиш жараёнларининг техник ҳолатига кўра қўшимча маълумот тақдим этилади.
Шуни алоҳида таъкидлаш керакки, "Халқлар дўстлиги" бекатида мавжуд эскалаторни янгисига алмаштириш мақсадида ёпилган иккинчи вестибюлда ҳозирда техник ишлар олиб борилмоқда. Ушбу вестибюль фаолияти бир ой муддатда қайта йўлга қўйилади.