2024 йилнинг ноябрида президентликка номзод Дональд Трамп CBS News телеканалини сайловларга аралашишда айблаб судга берди. Унинг таъкидлашича, Камала Ҳаррис билан бўлган интервью унинг саволга “ёмон ва қобилиятсизларча берган жавобини” яшириш учун таҳрирланган ва Трампнинг рақиби билан интервьюнинг таҳрир қилинмаган версиясини эълон қилишдан бош тортгани учун 10 миллион доллар товон пули талаб қилган. Шундан сўнг Трамп даъвони икки баравар ошириб, талабларини 20 миллион долларга кўтарди.
“Paramount интервью таҳрирлангани бўйича даъвони ҳал қилиш учун президент Трампга 16 миллион доллар тўлашга рози бўлди”, деб ёзади New York Times газетаси компания баёнотига таяниб.
Шунингдек, CBS телеканалига эгалик қилувчи Paramount компанияси АҚШ президентлигига номзодлар билан бўлган барча интервьюларни, жумладан, телеканалнинг собиқ президент Жо Байден билан бўлган интервьюсини ҳам эълон қилишга рози бўлди.
Илгари адвокатлар CBS телеканали судда ғалаба қозониши мумкин деб тахмин қилишган, чунки канал ёлғон маълумот тарқатиш билан шуғулланмаган ва АҚШ Конституциясига киритилган биринчи тузатиш маълумот тақдим этишда кенг ҳаракат эркинлигини таъминлайди. Бироқ Трампнинг даъвоси Техасда қўзғатилган ва бу штат қонунларининг бузилиши билан боғлиқ, деб хабар беради vesti.ru.
