“8 Субҳ” нашри хабарига кўра, отишма Тожикистоннинг Шамсиддин Шохин тумани ва Афғонистоннинг Бадахшон вилоятининг Шаҳри-Бузург тумани ўртасида жойлашган Дованг қишлоғида содир бўлган.
Дастлабки маълумотларга кўра, можаро икки мамлакат ўртасидаги табиий чегара бўлиб хизмат қилувчи Панж (Амударё) дарёси оқимининг ўзгариши туфайли юзага келган. Бу масала илгари икки томон ўртасида низоларга сабаб бўлган.
ОАВ хабарларига кўра, ҳодиса хорижий компаниялар, жумладан, Хитой компаниялари фаолият юритадиган олтин қазиб олиш ҳудудида содир бўлган.
Манбаларнинг таъкидлашича, отишма қурбонларга сабаб бўлган, аммо ҳалок бўлганлар ва жароҳатланганларнинг аниқ сони ҳали аниқланмаган. Қайси томонда одамлар қурбон бўлгани номаълум.
Журналистларнинг Тожикистон чегара қўшинларидан жавоб олишга уринишлари муваффақиятсиз якунланди.
Толибон ҳаракати ҳам ҳали расмий баёнот бермади. “8 Субҳ” хабарига кўра, отишмадан сўнг, ҳаракат вакиллари чегарадаги вазиятни муҳокама қилиш учун Бадахшоннинг янги ҳокими Исмоил Ғазнавий билан учрашув ўтказишди.
Шахри-Бузург тумани илгари Толибон кучлари ва тожик чегарачилари ўртасида қуролли ҳодисалар содир бўлган жой бўлган.
Аввалроқ, ҳаракат вакили Забиҳулла Мужоҳид Афғонистон ва Тожикистон ўртасидаги чегара “хавфсиз ва тўлиқ назорат остида” эканлигини айтган эди.
“Иккала томон ҳам хавфсизлик учун жавобгар ва биз ўз мажбуриятларимизни бажаряпмиз”, деб таъкидлади у.
Ҳодиса Балх вилояти губернатори Юсуф Вафо бошчилигидаги Толибон делегацияси Душанбега ташриф буюрганидан бир неча кун ўтгач содир бўлди.
У Тожикистон Миллий хавфсизлик давлат қўмитаси раиси Саймўмин Ятимов ва Уламолар кенгаши раҳбари Саидмукаррам Абдулқодирзода билан учрашувлар ўтказди.
Тожикистон Марказий Осиёда Толибон билан тўғридан-тўғри алоқалар йўқлигини расман эълон қилган ягона давлат бўлиб қолмоқда. Душанбе Қобул расмийларини инклюзив ҳукумат тузишга ва инсон ҳуқуқларини ҳурмат қилишга чақирмоқда.
Тожикистон ва Афғонистон ўртасидаги сиёсий позицияларга қарамай, савдо-иқтисодий алоқалар ва гуманитар ҳамкорлик давом этмоқда. Душанбедаги Афғонистон элчихонасига аввалги ҳукумат томонидан тайинланган дипломат, Хоруғдаги консулликка эса ҳозирги Қобул ҳокимияти вакили раҳбарлик қилмоқда.
Тожикистон элчихонаси ва консуллиги Афғонистонда фаолиятини давом эттирмоқда, деб хабар берди asiaplustj.info.
