Жорий йилнинг 17 сентябрь куни Вена шаҳрида Ўзбекистон Республикаси Вазирлар Маҳкамаси ҳузуридаги Атом энергияси агентлиги директори Азим Аҳмедхўжаев ва Халқаро атом энергияси агентлиги бош директори Рафаэль Гросси ўртасида учрашув бўлиб ўтди.
Агентлик ахборот хизматининг хабар беришича, учрашувда томонлар Ўзбекистонда атом энергетикасини ривожлантиришнинг муҳим жиҳатлари, жумладан, “Ўзатом” агентлигини қайта ташкил этиш ва кам қувватли атом электр станциясини (КҚАЭС) қуриш лойиҳаси хусусида сўз юритди.
Таъкидланганидек, ушбу лойиҳа бўйича дастлабки ишлар “Росатом” давлат корпорацияси билан ҳамкорликда ва ХАЭА тавсияларига тўлиқ амал қилган ҳолда бошланди. Лойиҳанинг халқаро хавфсизлик стандартларига мувофиқлигини таъминлаш уч томонлама қўллаб-қувватлаш орқали тасдиқланди.
ХАЭА билан биргаликда ядро технологиялари, жумладан, кичик модулли реакторларга бағишланган қўшма тадбирлар ўтказиш режалари кўриб чиқилди. Бу технологияларнинг халқаро аҳамиятини намойиш этиши билан бир қаторда бошқа давлатлар қизиқишини ҳам уйғотади.
Учрашувларни муваффақиятли ўтказиш ва икки томонлама ҳамкорликни мустаҳкамлаш мақсадида ХАЭА бош директорининг Ўзбекистон Республикасига ташрифига фаол тайёргарлик кўрилмоқда.
ХАЭА ва Ўзбекистон Республикаси халқаро стандартлар ва илғор тажрибаларга қатъий амал қилган ҳолда атом энергетикасини ривожлантириш ва лойиҳаларни амалга ошириш бўйича ҳамкорликни давом эттиради.
