UNEA-6 иқлим ўзгариши, табиий муҳит ва биологик хилма-хилликнинг йўқолиши, шунингдек, ифлосланиш ва чиқиндиларнинг кўпайиши каби уч томонлама сайёравий инқирозга қарши курашга қаратилган. Кучли илм-фан, сиёсий қатъият ва жамоатчилик иштирокига таянган ҳолда, Ассамблея ҳукуматлари, фуқаролик жамияти гуруҳлари, илмий доиралар ва бизнесга глобал экологик сиёсатни шакллантириш имкониятини беради.

5 кунлик сессия дастуридан ялпи мажлислар, иқлим ўзгариши шароитида инсоният фаоллиги, атроф-муҳитнинг ифлосланиши, биологик хилма-хилликнинг йўқолиши ва бошқа долзарб масалаларга бағишланган ёрдамчи тадбирлар, матбуот анжуманлари ва юқори даражадаги мулоқотлар ўрин олган.

Тадбир давомида Азиз Абдуҳакимов Ассамблея иштирокчилари билан атроф-муҳитни муҳофаза қилиш ва биохилма-хилликнинг йўқолишининг олдини олиш бўйича ҳамкорликни мустаҳкамлашга қаратилган бир қатор учрашувлар ўтказади, деб хабар беради Экология, атроф-муҳитни муҳофаза қилиш ва иқлим ўзгариши вазирлиги матбуот хизмати.