Мутахассисларнинг фикрича, сўнгги ўн йил ичида Афғонистон пойтахтида ер ости сувлари сатҳи 30 метрга пасайган. Бундай кескин вазиятнинг сабаблари – тез урбанизация ва иқлим ўзгариши оқибатлари. Шаҳардаги қудуқларнинг қарийб ярми аллақачон қуриб қолган ва сув истеъмоли ҳажми сув захираларини табиий равишда тўлдириш тезлигидан сезиларли даражада ошиб кетган – йиллик тақчиллик қарийб 44 миллион куб метрни ташкил этади.
Давом этаётган тенденция етти миллион шаҳар аҳолисининг ҳаёти учун ҳалокатли оқибатлар билан таҳдид солмоқда. Афғонистондаги Меҳрибонлик ташкилоти директори Дэн Каррига кўра, сув танқислиги аҳолининг мажбурий кўчирилишига олиб келади, халқаро ҳамжамият ёрдами етишмаслиги миграция муаммолари ва ижтимоий қийинчиликларни янада кучайтиради.
Танқисликка қўшимча равишда, қолган сувнинг сифати жиддий ташвиш туғдиради: ер ости манбаларининг деярли 80 фоизи канализация, туз ва мишьяк билан ифлосланган, бу суюқликни хавфсиз истеъмол қилиш учун яроқсиз ҳолга келтиради. Аҳоли даромадларининг катта қисмини тоза сув сотиб олишга сарфлашга мажбур – оила бюджетининг учдан бир қисми бунга сарфланади. Айрим оилалар коммунал тўловлар бўйича тўпланган қарзлар туфайли моддий қийинчиликларни бошдан кечирмоқда, деб хабар беради gazeta.ru.
Хусусий етказиб берувчилар вазиятдан фойдаланиб, сунъий тақчиллик яратиб, сувни ошириб юборилган нархларда сотишмоқда. Маҳаллий аҳолидан бири Назифа сув таъминоти нархи қисқа вақт ичида икки баравар ошганидан шикоят қилди: авваллари оила ҳар ўн кунда 500 афғоний тўларди, энди эса икки баробар кўпроқ тўлашга мажбур бўлмоқда.
