Қоровулбозор тумани “Навбаҳор” маҳалласида жойлашган “Замин агро экспорт” МЧЖга қарашли бўлган иссиқхонада ҳозирда томчилатиб суғориш йўли билан қулупнай етиштирилмоқда.
Мазкур "Корея" навли қулупнай 25 сотих майдонда экилган бўлиб, бошқа қулупнайларга нисбатан ширинлиги ҳамда серҳосиллиги билан ажралиб туради.
Иссиқхона иш юритувчиси Намоз Шиноновнинг таъкидлашича, кунига 20-30 кг қулупнай узилиб, савдога чиқарилмоқда.
— Бугунги кунда бозорларимизда қулупнайга бўлган талаб юқори. Қулупнайнинг ҳар 1 килограмини 120-130 минг сўмдан улгуржи нархда супермаркетлар ҳамда дўконларга етказиб беряпмиз. Ушбу иссиқхонадан 2 тоннадан ортиқ ҳосил олишни режалаштирилганмиз. Бу йил иссиқхонамизнинг қолган 25 сотих қисмига ҳам қулупнай кўчатлари ўтқазиш ниятидамиз, – дея таъкидлайди МЧЖ раҳбари Одилбек Эгамов.
Хулоса ўрнида айтиш жоизки, ерга меҳр бериб, меҳнат қилинса, албатта, бу ўз самарасини беради. Буни чўлқуварлар юртининг чўлида етиштирилаётган ушбу қулупнайзорларда ҳам тасдиғини кўришимиз мумкин.
