Фавқулодда вазиятлар вазирлигининг хабар беришича, шу йилнинг 1 май куни соат 07:01 да Тошкент шаҳар, Яккасарой тумани, Қўшбеги кўчасидаги Технопарк ҳудудида жойлашган синтифон ишлаб чиқариш цехида ёнғин рўй берганлиги тўғрисида ФВБга хабар келиб тушган.

Келиб тушган хабарга асосан ёнғин-қутқарув экипажлари соат 07:04 да ҳодиса жойига етиб борган. Ёнғин қутқарувчилар томонидан соат 07:45 да қуршаб олинган ва соат 08:09 да батамом ўчирилган.

Ёнғин бартараф этилгандан сўнг, ёнғин жойини ўрганиш давомида икки нафар фуқаронинг жасадлари аниқланган. Шунингдек, 5 нафар фуқаро тан жароҳати билан шифохонага юборилган.

Маълумотларга кўра, ёнғинни бартараф этишга 11 та асосий, 6 та махсус турдаги ёнғин ўчириш техникалари жалб этилган бўлиб, ёнғин оқибатида цехнинг тахминан 700 кв.м майдонда томи, шифти ва маҳсулотлари ёниб зарарланган.

Мазкур ҳолат юзасидан дастлабки тергов олди суриштирув ишлари олиб борилмоқда.