Ўзбекистон-Хитой муносабатларини ҳамда минтақалараро ҳамкорликни ривожлантириш масалалари бўйича фикр алмашилди.
Циндао шаҳридаги «Хитой – ШҲТ» Пилот зонаси ва Самарқанд шаҳридаги «Ўзбекистон – ШҲТ» саноат зонаси ўртасида алоқаларни йўлга қўйиш тўғрисида келишувга эришилди.
Икки мамлакатнинг турли соҳалардаги ҳар томонлама стратегик шериклигини янада мустаҳкамлаш истиқболлари, жумладан, ХХР раиси Си Цзиньпиннинг 2022 йил сентябрь ойида Ўзбекистонга давлат ташрифи якунида эришилган келишувларни амалга ошириш истиқболлари кўриб чиқилди.
Икки томонлама муносабатларда минтақалараро ҳамкорлик алоҳида ўрин тутгани баробарида, Циндао Ўзбекистон шаҳарлари билан ришталарни қўллаб-қувватлашга тайёрлиги таъкидланди.
Учрашув давомида Ўзбекистон Республикаси Ташқи ишлар вазири Владимир Норовга 2019-2021 йилларда ШҲТ Бош котиби лавозимида ишлаган даврида «Хитой – ШҲТ» Пилот зонасини ривожлантиришга қўшган ҳиссаси учун «Циндао шаҳрининг фахрий фуқароси» унвонини бериш тўғрисидаги гувоҳнома топширилди, деб хабар беради Ташқи ишлар вазирлиги матбуот хизмати.
