Маълумки, кундан-кунга ўз фаолиятини ислоҳ этиб, олий таълим хизматларининг барча йўналишида илгарилаб бораётган Фарғона давлат университети - ўтган йили бутун дунёга ўз нуфузи ва шаффофлиги билан танилган Буюк Британиянинг Times Higher Education - “THE” рейтингида “Барқарор ривожланиш мақсадлари”га (SDGs) мувофиқ 14 та йўналиш бўйича 1000+ натижани қайд этган эди.
Энг қувонарлиси, рейтинг агентлигининг куни кеча эълон қилинган «Impact Rankings» йўналиши натижаларига кўра, 5 та индикатор бўйича ФарДУ TOP 500 университетлар рўйхатидан ўрин эгаллади.
Шунингдек, танлаб олинган 10 та индикаторнинг яна 4 та йўналишида Фарғона давлат университети кўрсаткичлари TOP 1000+ талик рўйхатидан жой олди.
Ушбу натижаларнинг энг салмоқлиси, ФарДУ айнан сифатли таълим йўналиши бўйича 57,1 балл билан 400+ кўрсаткичга эришиб, TOP 500 университетлар рўйхатига киргани алоҳида аҳамиятга эгадир. Чунки дунёнинг 115 та давлатидан рейтингда иштирок этаётган 1963 та университетлар ичида айнан ФарДУ сифатли таълим маскани сифатида эътироф этилиши - ёшларни илму-маърифатли қилиш, Янги Ўзбекистонга муносиб етук, маънавиятли кадрларни тайёрлаш бобида олийгоҳнинг фидокорона меҳнати самарасини яққол кўрсатиб берди.
Айтиш керакки, жаҳондаги энг нуфузли университетлар “THE” рўйхатида ўз ўрнини сақлаш қолиш учун олға интилаётган халқаро таълим рақобати муҳитида Фарғона давлат университетининг рейтингдаги ўрни йилдан йилга юқорилаб бораётгани таҳсинга лойиқдир.
