Ўзбекистон ва АҚШ ўртасидаги савдо-иқтисодий ҳамкорликнинг бугунги ҳолати муҳокама этилиб, товар айирбошлаш ҳажмини ошириш, Ўзбекистоннинг ЖСТга аъзо бўлиш жараёнини фаоллаштириш ва икки томонлама муносабатлар кун тартибидаги бошқа долзарб масалалар бўйича навбатдаги чора-тадбирлар белгиланди.
Америка томони АҚШ Конгрессининг GSP имтиёзлар тизими дастурини фаоллаштириш ва янгилаш бўйича саъй-ҳаракатларини қўллаб-қувватлашини қайд этди ва Ўзбекистондан экспортни диверсификация қилиш жараёнида GSP ролини эътироф этди. Элчи Тай Ўзбекистонда амалга оширилаётган ислоҳотларни олқишлади.
Рақамли савдони ривожлантириш мақсадида қонунчиликни уйғунлаштириш масалалари бўйича ўзаро ҳамкорлик қилишга тайёрлик билдирилди.
Америка томони Ўзбекистон ЖСТга аъзо бўлиш бўйича қатъият билан ҳаракат қилаётганлигини ҳамда Ўзбекистондаги савдо режимини ЖСТ қоидалари ва тамойилларига мувофиқлаштиришга қаратилган ислоҳотларни қўллаб-қувватлашга тайёрлигини билдирди.
Кетрин Тай Ўзбекистонни интеллектуал мулк ҳуқуқларини ҳимоя қилиш ва таъминлаш соҳасидаги барқарор ижобий ўзгаришлар туфайли Махсус 301 кузатув рўйхатидан чиқарилгани билан табриклади. Томонлар бу борада яқин ҳамкорликни давом эттиришга тайёр эканликларини билдирдилар, деб хабар беради Инвестициялар, саноат ва савдо вазирлиги матбуот хизмати.
Таъкидланганидек, ошкоралик ва ўзаро маслаҳатлашув янада самарали меъёрий-ҳуқуқий ҳужжатларни ишлаб чиқиш, нотариф тўсиқларнинг олдини олиш ва камайтириш, халқаро савдо мажбуриятларига риоя этилишини қўллаб-қувватлаш учун замин яратади, шунингдек, иқтисодиётнинг узоқ муддатли барқарорлигини ошириш ва инвестицияларни жалб этишга хизмат қилади.
