Вазирлик маълумотига кўра, ташриф доирасида Вьетнамқишлоқ хўжалиги вазири ўринбосари Пҳунг Дук Тиен билан учрашув бўлиб ўтган. Унда икки давлат ўртасида қишлоқ хўжалиги ва озиқ-овқат соҳаларидаги ҳамкорликнинг кенг кўламли масалалари муҳокама қилинди.
Мулоқот якуни бўйича икки давлат ўртасида қишлоқ хўжалиги соҳасида ҳамкорлик қилиш, қишлоқ хўжалиги ва ўсимликлар карантини соҳасида ҳукуматлараро ҳужжатларни тайёрлаш бўйича ишчи гуруҳ тузиш бўйича келишувга эришилди.
Томонлар, шунингдек, Ўзбекистон шоличилик илмий-тадқиқот институти ва Ветнам қишлоқ хўжалиги фанлари академиясининг шоличилик бўйича илмий-тадқиқот институтлари иштирокида шолининг янги юқори маҳсулдор ва барқарор навларини яратиш учун Ўзбекистон ҳудудида қўшма шоличилик марказини ташкил этиш бўйича аҳдлашиб олди.
Бундан ташқари Қорақалпоғистон Республикаси Қишлоқ хўжалиги ва агротехнологиялар институти ва Вьетнам миллий аграр университети ўртасида шоличилик йўналиши бўйича қўшма магистратура ўқув дастурини яратиш юзасидан бир тўхтамга келинди.
Мулоқот давомида Тошкент давлат аграр университети ва Вьетнам миллий аграр университети ўртасида шоличилик ва балиқ етиштириш йўналишида кадрлар малакасини ошириш ва қўшма илмий-тадқиқот ишларини олиб бориш учун талабалар ва профессор-ўқитувчилар алмашинуви масаласи ҳам муҳокама қилинди.
Ипакчилик бўйича Ўзбекистон тажрибасини ўрганиш учун вьетнамлик талаба ва олимларни Ўзбекистонга юбориш масаласини ишлаб чиқиш хусусида сўз юритилди.
Ўзбекистон делегацияси икки кунлик ташриф давомида Вьетнам Қишлоқ хўжалиги фанлари академиясида тажриба шоли майдонлари ва қулупнай етиштиришга мўлжалланган йил давомида фаолият юритувчи иссиқхона мажмуаси, Ханой шаҳридаги «MTT Vietnam Investment» компаниясининг ем ишлаб чиқариш заводи фаолияти билан танишди.
Бундан ташқари, Вьетнам компаниялари билан шоличилик, балиқчилик, қисқичбақа етиштириш, сабзавот ва полиз экинлари уруғчилиги каби соҳаларда қўшма инвестициявий лойиҳаларни йўлга қўйиш истиқболлари юзасидан фикр алмашилди.
