“Ғиждувон” эркин иқтисодий зонасининг Когон тумани ҳудудида “Сиёвуш Текстиль Бухоро” МЧЖ томонидан қиймати 36,0 млн. долларга тенг йилига қуввати 40,0 минг тонна акрил ип-калава маҳсулотларини ишлаб чиқариш лойиҳаси амалга оширилишига киришилган эди.

Бугун мазкур лойиҳа ишга туширилди. Шу муносабат билан ташкил этилган тадбирда вилоят ва туман ҳокимликлари мутасаддилари, корхона ишчи-ходимлари, жамоатчилик иштирок этди.

Тадбирда сўз олган вилоят ҳокими Ботир Зарипов тадбиркорликни қўллаб қувватлаш, қулай бизнес муҳитини шакллантириш Янги Ўзбекистон тараққиётининг муҳим омилларидан бирига айланганини эътироф этди. Зеро, давлатимиз раҳбари таъкидлаганларидек, “тадбиркор бой бўлса, халқ ҳам, давлат ҳам бой бўлади”.

Қайд этиш жоизки, лойиҳа ишга туширилиши натижасида вилоятимизда сифатли акрил ип-калава маҳсулотларини ишлаб чиқариш йўлга қўйилди. Бу орқали эса вилоятнинг экспорт кўрсаткичлари учун қўшимча 6,0 млн. долларлик захира базаси яратилиб, 4,5 млрд. сўмлик бюджетга қўшимча тушумлар тушиши таъминланади. Шу билан бирга, корхонада 1200 дан ортиқ доимий иш ўрни яратилди.

Лойиҳанинг ишга туширилиши акрил ип-калава ҳамда ундан тайёр маҳсулот ишлаб чиқариш жараёнларини тўлиқ маҳаллийлаштириш имконини ҳам бермоқда. Тадбиркор хорижлик ҳамкорлар билан биргаликда кейинги босқичда корхона фаолиятини янада кенгайтириш устида иш олиб бормоқда.

— Акрил ип-калава бугун мамлакатимиз текстиль саноатида янги йўналиш. Шунга қарамай, биз келгусида янада каттароқ лойиҳани амалга оширишни режа қилганмиз,-дейди корхона таъсисчиси Замир Баратов.

Янги корхона — янги имконият. Чўл бағрида қисқа фурсат ичида бундай муҳташам корхонанинг иш бошлашини шунчаки тасаввурга сиғдириш қийин. Буни янги фабрикада бўлган узоқ йиллик тажрибага эга меҳнат фахрийлари ҳам алоҳида эътироф этишди.

Бухоро вилоят ҳокимлиги матбуот хизмати