Polaris Dawn номи билан маълум бўлган миссия профессионал бўлмаган астронавтларнинг биринчи марта коинотга чиқишини назарда тутади.
Falcon 9 ракетаси Crew Dragon фазовий кемаси билан Флорида штатидаги Кеннеди коинот марказидаги учириш мажмуасидан АҚШ Шарқий вақти билан 05:23 да ҳавога кўтарилди. Ракетанинг учирилишидан 12 дақиқа ўтгач, кема ракетанинг иккинчи босқичидан ажралиб чиққандан сўнг орбитага муваффақиятли чиқди.
Polaris Dawn 1400 километргача бўлган парвоз баландлиги рекордини ўрнатишни мақсад қилган, бу 1966 йилдаги Gemini 11 миссиясининг натижасини янгилаш имконини беради.
Бу Shift4 Payments асосчиси, миллиардер Джаред Айзекман томонидан молиялаштириладиган Polaris дастурининг учта миссиясидан биринчиси. Экипаж таркибида Айзекмандан ташқари собиқ АҚШ ҳарбий-ҳаво кучлари подполковниги Скотт Потит ва SpaceX муҳандислари Сара Гиллис ва Анна Менон ҳам бор. Ер орбитасига беш кунлик саёҳат Ой ва Марсга бўлажак миссиялар имкониятларини чамалаб кўришга ёрдам беради, деб хабар беради korrespondent.net.
