“Биз ускунамизнинг Ойда эканлигини тасдиқлашимиз мумкин ва сигнал олмоқдамиз, Odysseus янги уй топди”, деди Odysseusнинг парвоз директори трансляция пайтида.
15 февраль куни Ердан учирилган фазовий кема Ойга автоном режимда қўнишни амалга оширди. Парвозни бошқариш маркази у билан алоқани йўқотгандан сўнг ҳам қўниш билан боғлиқ жараён муаммосиз ўтди. Сигнални қайта тиклаш ва қўниш фактини тасдиқлаш учун тахминан ўн дақиқа вақт кетди.
Odysseus соат 18:23 да Ой юзасига қўнган. NASA директори Билл Нельсон Odysseus миссиясини “ғалаба” деб атади ва Intuitive Machines ишлаб чиқиш компаниясини, SpaceX учириш операторини ва АҚШнинг Ой юзасига қайтиши миссиясида иштирок этган барчани табриклади. Америка ускунаси охирги марта 1972 йилнинг декабрида қўнган эди.
NASA билан тузилган шартнома асосида Intuitive Machines томонидан ишлаб чиқарилган Odysseusнинг парвози “Артемида” дастури доирасида кейинги бир неча йил ичида Ойга халқаро экипажни қўндириш ва Ой станциясини қуриш йўлида ва шу орқали АҚШнинг Ойга “қайтиши” жараёнидаги муҳим босқич саналади, деб хабар беради ria.ru.
